Martın 10-da Musiqili Komediya Teatrında Azərbaycan teatrının yeni mövsümünün açılışı olub. APA-nın məlumatına görə, tədbirdə respublikanın mədəniyyət xadimləri, aktyorlar, millət vəkilləri, həmçinin mədəniyyət və turizm naziri Əbülfəz Qarayev iştirak edib.
Əvvəlcə Ə. Qarayev təmir olunmuş Musiqili Komediya Teatrının binası və foyedəki sərgi ilə tanış olub.
Daha sonra tədbirə qatılan nazir çıxış edərək bildirib ki, bu ildən dövlət başçısının sərəncamı ilə 10 mart Azərbaycan Teatr işçilərinin peşə bayramı kimi qeyd olunmağa başlayıb. Hazırda respublikada 30-dək teatrın olduğunu deyən Ə. Qarayevin sözlərinə görə, son 7 ildə Azərbaycan teatrında çalışan 300-dən çox şəxs müxtəlif fəxri adlara, o cümlədən 272 nəfər “Xalq artisti” adına layiq görülüb. Teatrlarda son 10 ildə 900-dən artıq tamaşa qoyulub. Teatrların maddi-texniki bazası gücləndirilib.
Sonra nazir prezidentin sərəncamı ilə təltif olunan mədəniyyət işçilərinə mükafatları, həmçinin mədəniyyət və turizm nazirinin əmri ilə təltif olunmuş bir qrup şəxsə Mədəniyyət və Turizm Nazirliyinin fəxri döş nişanlarını təqdim edib.
Tədbirdə çıxış edən Azərbaycan Teatr Xadimləri İttifaqının sədri Azərpaşa Nemətov teatr işçilərini peşə bayramı münasibəti ilə təbrik edib. Bir qrup teatr xadiminə Azərbaycan Teatr Xadimləri İttifaqının “Sənətkar” medalı təqdim olunub.
Tədbir Musiqili Komediya Teatrının açılışına həsr olunmuş “Bu bizik” tamaşasının nümayişi ilə davam edib.
