"Paramount Skydance Corp." şirkəti "Warner Bros. Discovery" ilə 111 milyard dollarlıq birləşmə müqaviləsini 2027-ci il iyunun 1-dək təxirə salmağa razılaşıb.
Kulis.az xəbər verir ki, bu barədə "Variety" nəşri məlumat yayıb.
Məqaləyə görə, təxirəsalma inhisarçılığa qarşı məhkəmə prosesi ilə bağlıdır: Kaliforniya başda olmaqla 12 ştat müqavilənin bloklanması tələbi ilə məhkəməyə müraciət edib. Onlar hesab edirlər ki, birləşmə kino bazarında rəqabəti azaldacaq.
"Amerikalıların həyatı üçün mərkəzi əhəmiyyət kəsb edən bazarlarda çox az sayda korporasiya həddindən artıq böyük hakimiyyətə malik olduqda, bu, hər şeyi bahalaşdırır və vəziyyəti pisləşdirir", – deyə Kaliforniyanın baş prokuroru Rob Bonta "Paramount"la olan razılaşmanı şərh edib.
İyunda ABŞ Ədliyyə Nazirliyi "Paramount Skydance Corp."un "Warner Bros. Discovery"ni alması ilə bağlı müqaviləni təsdiqləyib. Qurum bu birləşmənin rəqabətə və ya istehlakçılara zərər vurmayacağını hesab edib.
"The Wall Street Journal"ın məlumatına görə, Ədliyyə Nazirliyinin hüquqşünasları əvvəlcə müqaviləyə etiraz etməyi tövsiyə etmək istəyirdilər, çünki iki kinostudiyanın birləşməsinin rəqabəti məhdudlaşdıra və inhisarçılığa qarşı qanunvericiliyi poza biləcəyini düşünürdülər. Lakin iyunun 12-də Ədliyyə Nazirliyində yoxlama dayandırılıb ki, bu da faktiki olaraq müqavilənin təsdiqlənməsi olub. Xəbər kino rubrikasında yer alır.
