Türkiyədə keçirilən Azərbaycan Kino Günləri çərçivəsində Bursa şəhərinin Uludağ Universitetində rejissor Hüseyn Seyidzadənin 1978-ci ildə C.Cabbarlı adına “Azərbaycanfilm” kinostudiyasında ekranlaşdırdığı “Qaynana” bədii filmi nümayiş olunub. Ekran əsəri Xalq artisti Nəsibə Zeynalovanın anadan olmasının 110 illiyi münasibətilə təşkil olunan tədbir çərçivəsində nümayiş etdirilib.
Kulis.az xəbər verir ki, izləyicilər arasında Uludağ Universitetinin, Azərbaycan Respublikası Mədəniyyət Nazirliyinin və Türkiyənin Bursa şəhəri Mədəniyyət və Turizm İdarəsinin təmsilçiləri, bu ali təhsil müəssisəsinin müəllim-tələbə heyəti yer alıb.
Əvvəlcə çıxış edənlər Nəsibə Zeynalovanın yaratdığı obrazların yalnız tamaşaçıları güldürməklə kifayətlənmədiyini, eyni zamanda, dərindən düşünməyə vadar etdiyini bildiriblər.
Natiqlər sənətkarın Azərbaycan teatr məktəbinin seçkin nümayəndələrindən biri kimi milli səhnə sənətimizin inkişafına verdiyi töhfələrdən bəhs ediblər.
Ekran əsəri izləyicilər, xüsusən də filmi ilk dəfə seyr edənlər tərəfindən maraqla qarşılanıb.
