Kulis.az Mətləb Ağanın “...və bu sentyabr da” şeirini təqdim edir.
... və bu sentyabr da
köçünü yığışdırır...
yenə bir külək düşüb
küçəni yığışdırır...
...saatın tıqqıltısı
günortadan kəsilib...
divarda bir şəkil var,
tən ortadan kəsilib...
...bundan sonra, dirisən
ölüsən, eyni şeydi...
ya Janna Dark ol indi,
ya Süsən, eyni şeydi...
durub fikirləşirsən:
“bir oyundu... kim kimi...”-
pəncərədən boylanıb,
kəsilmiş şəkil kimi...
