Marketdən bəzi zəruri şeylərlə bərabər, yekə bir diş pastası almışdım( yaxşı, qoy olsun diş məcunu. Amma olmur axı. Dadlı, ləzzətli, YEYİLƏN təamlara deyilir məcun: diş pastası yeyilir ki? Hər halda normal adamlar yemirlər onu). Kücədə Gülnarla rastlaşdım, paketdəki pastanı görüb:

- Nə yekə pasta almısan,- dedi, - bir il işlətsən, qurtarmaz.

Dedim:

- Hə, "vıqodnaya pokupka"dır: düz 231 qram.

Gülnar:

- Yaxşı görək,- dedi,- neçəyə almısan?

- Səncə, neçəyə olar?

Gözlərini qıyıb bir neçə an təxmin etməyə calışdı və dedi:

- 3 manata.

- Ayy, 30 qəpik səhv elədin.

- 3 manat 30 qəpiyə?

Mən gülüb dedim ki, yox, 2 manat 70 qəpiyə. "Sağlıqla işlədin" dedi. Bir neçə addim aralanmışdıq, ağlıma qəfil gəlmiş bir fikirlə çevrilib onu səslədim:

-Gülnar!.

Cevrildi:

- Nədi?

- Bayaq sənə "30 qəpik səhv elədin" deyəndə sən niyə 2.70 yox, 3.30 dedin?

Çiyinlərini çəkdi:

- Nə bilim, dedim də. Ağlima elə gəldi, elə də dedim.

- Səncə, bu cavab elə-belə, təsadüfən çıxdı sənin dilindən? -dedim və o, üzümdə nə gördüsə:

-Vəssalam!..- dedi,- yenə əcaib nəsə tapdın qaralamağa? Adı nə olacaq? "Kolqeytin qiyməti"?

- Sən rişxənd elə, amma yaza bilən olsa, bu 30 qəpik məsələsi əsil yazı mövzusudu, - sonra əlavə elədim,- oturub bildiyim kimi yazacağam, səni də əsas surətlərdən biri edəcəyəm. Di hı.

Gülnar mənə doğma, qayğılı bir nəzər salıb başını yellədi, cevrilib gedə-gedə:

-Göndərərsən, oxuyaram,- dedi,- amma mən bilmədim, bu 30 qəpik məsələsində yazılası nə gördün sən.

Doğrudan da... Bu qəpik məsələsində nə var axı yazılası, mən də onu bunca urvata mindirdim belə?

• Məşhur aparıcı xərçəngdən vəfat etdi
• Rusiya və ruslar bizdən nə istəyir? - Baş verənlərin pərdəarxası
• Xalq artisti axtarışa verildi