"Universal Pictures" şirkəti səbirsizliklə gözlənilən "Şrek 5" animasiya filminin yeni treylerini təqdim edib.

Kulis.az xəbər verir ki, sözügedən video yutub platformasında yayımlanıb.

Yeni treylerdə tamaşaçılara ilk dəfə olaraq Fiona və Şrekin böyümüş oğulları – Ferqyus və Farkl nümayiş etdirilib. Süjet xəttinə gəlincə, yeni ekran işində Eşşək öz ailəsi ilə birlikdə sehrli bir ölkəyə maraqlı səyahətə yola düşəcək.

Geniş prokata 30 iyun 2027-ci ildə çıxacaq cizgi filminin səsləndirmə heyətində həm köhnə ulduzlar, həm də yeni məşhurlar var:

Şrek — Mayk Mayers

Fiona — Kemeron Dias

Eşşək — Eddi Mörfi

Felisiya (Şrekin qızı) — Məşhur aktrisa Zendaya heyətə yeni qoşularaq bu obrazı canlandıracaq.

Ferqyus və Farkl (Şrekin oğulları) — Komik Marsello Ernandes və aktyor Skayler Qizondo.

Qeyd edək ki, "Şrek 5"in ilk rəsmi treyleri 2025-ci ilin fevralında yayımlanmışdı. Lakin həmin vaxt franşiza pərəstişkarları məşhur qəhrəmanların yeni dizaynını, xüsusən də Şrekin vizual görünüşünü sosial şəbəkələrdə kəskin tənqid etmişdilər. Görünür, müəlliflər bu iradları diqqətə alıblar. Yeni treylerdə Şrekin xarici görünüşünün dəyişdirilərək əvvəlki hissələrdəki orijinal halına daha çox bənzədildiyi açıq-aydın hiss olunur.

Xatırladaq ki, ndiyədək çəkilmiş dörd "Şrek" filmi dünya prokatında ümumilikdə 2,9 milyard dollar gəlir əldə edib. Bu layihə sadəcə bir film seriyası olaraq qalmayıb qlobal konsert şousuna, Brodvey müziklına və bütün dünyadakı "Universal Studios" parklarında ən populyar attraksion mövzusuna çevrilib.

2001-ci ildə ekranlara çıxan orijinal "Şrek" filmi "Ən yaxşı animasiya filmi" nominasiyasında tarixdə ilk "Oskar" mükafatını qazanan ekran işidir.

• "Sosial hesablama" niyə "Sosial şəbəkə"nin kölgəsində qaldı?
• Romanı oxumaq niyə bu qədər çətindir? – “Rəng mühəndisi”nin toz-dumanlı dünyası
• Xalq yazıçısı Çingiz Abdullayevlə oxucuların görüşü