Bu günlərdə filologiya elmləri doktoru, professor Salidə Şərifovanın “Fərəc Fərəcov yaradıcılığının problematikası, janr müxtəlifliyi və bədii xüsusiyyətləri” adlı monoqrafiyası çapdan çıxıb.
Kulis.az xəbər verir ki, monoqrafiya Azərbaycan Milli Elmlər Akademiyası Nizami Gəncəvi adına Ədəbiyyat İnstitutu Elmi Şurasının qərarı ilə işıq üzü görüb. Beş fəsil və 164 səhifədən ibarət monoqrafiyada Naxçıvan Muxtar Respublikasının Əməkdar jurnalisti, şair, yazıçı, publisist, Naxçıvan Muxtar Respublikası Ali Məclisinin deputatı Fərəc Fərəcovun yaradıcılığı geniş şəkildə tədqiq edilib. Monoqrafiyada Fərəc Fərəcovun həyatı, bədii və elmi publisistikası, qələmə aldığı nəzm və nəsr əsərlərinin problematikası, janr müxtəlifliyi və bədii xüsusiyyətləri geniş təhlil edilərək, oxuculara təqdim olunur.
Akademik İsa Həbibbəyli monoqrafiyanın “Əməldə və əsərlərində özünüifadə nümunəsi” adlı "Ön söz"ündə monoqrafik tədqiqatı Fərəc Fərəcovun yaradıcılıq fəaliyyətinin danışan dili kimi qiymətləndirib: “Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun baş elmi işçisi, filologiya elmləri doktoru Salidə Şərifovanın “Fərəc Fərəcov yaradıcılığının problematikası, janr müxtəlifliyi və bədii xüsusiyyətləri” adlı monoqrafiyasında ilk dəfə olaraq yazıçı-publisistin həyatı və yaradıcılıq yolu geniş şəkildə təhlil olunub elmi cəhətdən qiymətləndirilmişdir. Yaxşı cəhətdir ki, Salidə Şərifova Fərəc Fərəcovun yaradıcılığını yalnız mövzu dairəsinə və ideya cəhətdən aktuallığına görə deyil, həm də bədii-sənətkarlıq xüsusiyyətləri ilə birlikdə tədqiq edib nəzəri cəhətdən ümumiləşdirir. Təqdim olunan monoqrafiya yaradıcılığı az tədqiq və təbliğ olunmuş Fərəc Fərəcovun ədəbi portretini açıb göstərən əhəmiyyətli elmi oçerklərdir. Tanınmış yazıçı-publisist Fərəc Fərəcov haqqında yazılmış kitab əməlləri və əsərləri ilə özünü həyatda və ədəbiyyatda təsdiq etmiş təmkinli Azərbaycan ziyalısı və özünəməxsus xidmətləri olan yazıçı-publisist Fərəc Fərəcovun yaradıcılıq fəaliyyətinin danışan dilidir”.
“Sənətkarın elmi pasportu-22” seriyasında çap olunmuş monoqrafiyanın elmi məsləhətçi akademik İsa Həbibbəyli, rəyçisi Azərbaycan Milli Elmlər Akademiyasının müxbir üzvü, professor Tehran Mustafayev, elmi redaktoru filologiya üzrə fəlsəfə doktoru, dosent Mehman Həsənlidir.

• Nəriman Həsənzadə xəstəxanaya yerləşdirilib
• "Kainatın hökmdarları" əsasında bədii film çəkiləcək
• Teatr tamaşaları, film nümayişləri... - ƏDV-nin 50 faizi qaytarılacaq