Mahatma Qandinin şəxsi məktubları ölümünün 65-ci iliylə bağlı dünəndən etibarən Hindistanın paytaxtındakı Milli Arxiv Muzeyində nümayiş olunur. Kulis.Az Türkiyənin “Radikal” qəzetinə istinadən xəbər verir ki, həmin məktublarda Qandinin Herman Kallenbax adlı yəhudi memarla homoseksual münasibətdə olması ilə bağlı məqamlar var.
Cənubi Afrika Respublikasında Herman Kallenbaxla iki il bir evdə yaşayan M.Qandi Hindistana qayıtdıqdan sonra Kallenbaxa yazdığı məktublarda ona “Sevgili Avam Kamaram”, “Sevgilərimlə, Lordlar Kamarası” deyə müraciət edib.
“Nyu York Tayms” qəzetinin redaktoru Xosep Leliveldin bir müddət əvvəl çap etdirdiyi “Böyük Ruh: Mahatma Qandi və Hindistan Mübarizəsi” kitabında hindistanlı liderin Kallenbaxa yolladığı məktubda “Bədənimə necə sahib olmuşdun” yazması və “Qandi biseksualdır” iddiası Hindistanda qəzəb yaratmışdı.
Bundan başqa ingilis yazıçısı Jad Adamsın yazdığı “Qandi: Çılpaq Ambisiya” kitabında da Qandinin qeyri-ənənəvi cinsi oriyentasiyaya sahib 
olduğu, dini liderin gecələr yanında iki çılpaq qadınla yatdığı halda onlara toxunmadığı yazılmışdı.
Jad Adams Qandinin 13 yaşında evləndiyini və normal cinsi münasibətlərinin yatmış atasının yanında həyat yoldaşıyla cinsi əlaqəyə girənə kimi davam etdiyini yazıb. Adams daha sonra yazır ki, bu hadisədən sonra atasının öldüyünü görən Qandi bunun ilahi bir işarə olduğuna inanıb və 15 il müddətində həyat yoldaşıyla cinsi əlaqəyə girməyib.
Qandinin 15 il müddətinə cinsi əlaqəyə girməməyinə rəsmi səbəb kimi onun irqçiliyə qarşı mübarizə aparmasını göstərirlər. Ruhunu təmizləməyə qərar verən Qandi şəhvətə qapılacağı təqdirdə özünü ölkəsi üçün mübarizəyə həsr edə bilməyəcəyini düşünüb və həyat yoldaşının icazəsiylə subaylıq andı içib.
Hindistan Milli Arxiv Muzeyindən Rac Bala Cayn isə Qandi və Kallenbax arasındakı dostluğun yanlış anlaşıldığını söyləyib.
