Bir-birimizi güldürmək, kefimizi açmaq üçün hər gün onlarla zarafat edirik. Bəzi zarafatla sözlə, bəzilərini hərəkətlə edirik.

Gənclər arasında hər dövrün özünə görə zarafatları olur. Amma zaman keçdikcə bu zarafatlar köhnəlir, yeniləri çıxır. Həm də çox işlədildiyindən dadı duzu qaçır.

Həm də müasir insanı köhnə zarafatlarla güldürmək çətindir. Lakin bəzi adamlar israrla zarafat repertuarlarında mühafizəkarlıq edərək istismar müddəti bitmiş zarafatları edirlər.

Bəşir Səfəroğlunun məşhur “ölünün də qıdığı gələr” səhnəsi indi çox az adam üçün gülməlidir. Amma vaxt var idi həmin səhnələri saatlarla alqışlayırdılar.

Kulis.az bəzi vaxtı keçmiş zarafatları təqdim edir:
- “Pulu vermişəm, düşərsən” - bu zarafat metroda işlənilirdi.
- “Metronun təkəri partladı” – bunu da metroda qatar dayananda deyirdilər.
- “Aydın deyil, filankəsdi”. Bir şey haqqında danışda qarşıdakı adam “aydındı” deyirdisə, əvəzində bu zarafat edirdilər. Və yaxud “su aydınlıqdı” ifadəsini işlədəndə, əvəzində “Aydın deyir? mənlik deyil” zarafatını edirdilər.
- “Sabah boşsan?- Yox, Panasonikəm”- Bu Azərbaycan dilindəki “boş” sözü ilə məşhur “Bosch” arasındakı söz oyunu nəticəsində yaranmış zarafat idi.
- Tualetə gedən adam haqda zarafatla “mədəniyyət sarayına gedib” ifadəsini işlədirdilər.
- “Sizdə qazlar gəlir? - Bəli! - Onda qapını aç, ördəklər də gələcək!”
- Bir nəfər o birindən siqaret aldıqdan sonra, alışqanı istəmək üçün belə deyirdi: “P.xu vermisən, qaşığı da ver”
- Dekabrın 31-də bir-birindən ayrılanda “gələn il görüşərik” zarafatını edirdilər.
- “Gəl, yemək ye!”- “Yemişəm!”- “Mən də qarpızam”
- “Necəsən? Elə bildim cücəsən” bu zarafat o qədər köhnəlib ki, bəlkə də çox adamın yadından çıxıb.
- Evə zəng edib “Salam, sizə soyuducu lazımdır?”- deyə soruşurdular. “Yox” cavabını alanda isə deyirdilər: “Onda çıxardın qoyun qapının ağzına gələk aparaq”
- Danışığında “ona qalsa” şərt cümləsini işlədən adama söz oyunu oynayıb, indiki saatı demək də kifayət qədər köhnəlib.
- “Nikolayın vaxtında”. Bu zarafatı keçmiş zamanı ifadə etmək üçmün deyirdilər.
- “Keçmiş birinci ildə”. Bu zarafat da ömrünü çoxdan başa vurub.
- “Nəylə gəlmisən: 11 nömrə ilə”. Piyada gəlməyi ifadə etmək üçün işlədilən bu zarafata da az təsadüf olunur.
-


Günel Əsgərzadə

• Şahın orden bağışladığı, Dəmirəlin heyran qaldığı "Ağ çiçək" - Səhnəmizin kimsəsiz Leylisi
• Təbəssüm - Rey Bredberinin hekayəsi
• "Netflix"in məşhur filminin davamı çəkiləcək