Məşhur rejissor Kventin Tarantino Fransada nəşr olunan "Premyera" jurnalına müsahibəsində müasir film tənqidinin səviyyəsindən çox narazı olduğunu bildirib.

Onun fikrincə indiki tənqidçilərin nəzəri bilikləri yoxdur, zəif yazırlar və filmləri kifayət qədər dərindən təhlil etmirlər.

Tarantino həmçinin son filmindən sonra rejissorluq sənətindən uzaqlaşdığını və artıq yazıçı kimi fəaliyyət göstərəcəyini də açıqlayıb.

"Planımda çəkmək istədiyim bir film olsa da mən artıq rejissor deyiləm, yazıçıyam. Bir rejissor kimi gələcək karyeram barədə düşünmürəm, özümü daha çox bir yazıçı olaraq görürəm. Pyeslər, romanlar, eləcə də kino haqqında kitablar yazmaq istəyirəm. Kinodan ayrıldıqdan sonra başqalarının işlərini daha sərbəst müzakirə edə bilərəm".

Rejissor əmindir ki, indiki vəziyyətdə yazıçıların inkişafı üçün çox şey var.

"Mən Polin Keyl, Endryu Sarris kimi mütəxəssislərin yazdığı tənqidləri oxuyaraq böyüdüm. Vaxt var idi ki, filmlər haqqına yazı yazarkən tənqidçilər ifadə qurmaq, kino terminlərindən istifadə etmək üçün bir redaksiyada işləməli olurdular. Bugünkü vəziyyət isə daha demokratikdir. İndi bu cür tələblər artıq məcburi deyil və az qala cəfəngiyat hesab olunur. İndi mətnlərini internetə yerləşdirən və ya podkast yazan insanların çoxu sadəcə həvəskarlardır. Onlar mətnin nəzəriyyəsinə, təhlilinə və keyfiyyətinə kifayət qədər əhəmiyyət vermirlər"

Müasirlərindən rejissor “New York Times” qəzetinin aparıcı film tənqidçisi Manola Dargisin üslubunu yüksək qiymətləndirdiyini bildirib.

• Qrafikaya romantik ruh bəxş edən rəssam - Cəmil Müfidzadə yaradıcılığının estetikası
• Qəbələdə fortepiano və tar ixtisasları üzrə ustad dərsləri təşkil olunacaq
• Tənqidi realizmin ən yaxşı romanlarından biri - Nəşri niyə qadağan edilmişdi?