writer1

Günel Natiq

Məqalə sayı

147
clock10:31 calendar-gray 29 İyul 2019 view-gray4320 dəfə oxunub
view-gray4320 dəfə oxunub

Bibisini öldürən oğlanın yalanı

Yenə növbəti qadın öz azadlığının qurbanı olub. Sərbəst həyat tərzinə görə qətlə yetirilib. Qətlə yetirən də özgəsi yox, doğmaca qardaşı oğludur.

Qardaşoğlunun dediyinə görə, bibini “namus üstündə” öldürüb. Bir neçə dəfə gənc qadını izləyib, onun bir neçə oğlanla görüşdüyünün şahidi olub. “Qeyrəti” yol verməyən oğlan “namusunu təmizləyib”.

Yəqin ki, ibtidai təfəkkür sahiblərindən ona haqq verənlər də olacaq. Təəssüf ki, qadın belələri üçün şəxsi müstəqilliyi olmayan, yalnız kişilərdən asılı bir şəxsdir.

Bu adamların fikrincə, qadını namus üstündə döymək, hətta öldürmək də olar.

Mental dəyərlərdən dəm vuranlar ailə dəyərlərini niyə unudurlar? Ailə dəyərləri də mental dəyər deyilmi? Bir qadının öz şəxsi həyatına sahib çıxması ailə üzvlərinin bir-birini qanına qəltan etməsindən daha dəhşətlidir?

Bibisini öldürən “qardaşoğlu” belə bir ssenari cızıb; guya əvvəl elə zənn edib ki, o, bir nəfərlə görüşür. Sonra izləyib və görüb ki, onlar bir neçə nəfərdirlər.

Çox güman ki, bütün bunları qatil özündən uydurub.

Bu adam bibisinin bir oğlanla deyil, bir neçə nəfərlə görüşdüyünü deyərək qadına əxlaqsız damğasını vurur və qatilliyinə daha tutarlı səbəb uydurur.

Tutaq ki, bibini izləyərək biriylə görüşdüyünü öyrənib və bunu normal qəbul edib. Amma təqiblərini nəyə görəsə dayandırmayıb və izləməkdə davam edib. Bu dəfə də başqa bir adamla görüşdüyünün şahidi olub. Üçüncü gün yenə izləmələr davam edib və bu dəfə “namuslu qardaşoğlunun” ayrı bir adam çıxıb qarşısına.

Sözsüz ki, bütün bunlar cəfəngiyatdır. Birincisi, bibinin həyatında bir adamın olduğunu öyrənən qardaşoğlu niyə təqiblərdən əl çəkmir? İkincisi, dediklərindən belə çıxır ki, bibinin həyatında bir adamın olduğuna normal, yəni sivil adam kimi yanaşır. Belə sivil təfəkkürə malik adam hətta bir neçə adamın olduğunu öyrənəndən sonra da bu qədər vəhşiləşib qatilə çevrilməz. Bibiylə danışmağa, məsələni aydınlaşdırmağa çalışar. Nə olur olsun, həmin sivil adam bu vəhşiliyi törətməz.

Üçüncüsü, bibinin həyatında tutaq ki, bir neçə adam var. Bu qadın müstəqil bir insan deyilmi? Qadın olduğu üçün həyatı barədə ətrafdakılara hesabat verib, onların razılığnı almalıdırmı? İbtidai təfəkkürlü adamlar nə zaman qadının da canlı insan olduğunu dərk edəcəklər?

Kişilər döyərək öldürdükləri qadınlar haqqında adətən, eyni ssenarini cızırlar: “Mən ona niyə belə etdiyini soruşanda özüm bilərəm deyib üstümə bağırdı və məni söydü”.

Niyə görəsə “namuslu kişilər” tərəfindən öldürülmüş qadınlar eyni davranışda bulunurlar. Hamısı da “özüm bilərəm” deyib söyüş söyür. “Namuslu kişi” də bu təhqirlərdən əsəbiləşib önu qanına qəltan edir.

Birincisi, belə bir vəziyyətdə heç bir qadın “özüm bilərəm” deməz. Yəqin ki özünə haqq qazandırmağa, təmizə çıxarmağa (əgər günahı varsa) çalışar. Bəlkə də üzr istəyər, yalvarar. Çox reaksiyalar ola bilər. Amma qatillərin yalnız bir versiyası var.

Nədənsə qadın hüquqlarından danışanda bəzi kişilər qıcıqlanır, kinayə edirlər: “Bəlkə dünyanı qadınlara verək?” Amma istehzalı yanaşmanın əvəzində öldürülən qadınların taleyi haqqında bir az düşünsələr, hamı üçün faydalı olar. O qadınların ki, uşaqları ana qayğısından məhrum olub, uşaq evlərinə atılıblar, ailələri ömür boyu övlad dağıyla yaşamağa məhkum olunub. Aktrisa Nuriyə Əhmədovanın qızını xatırlayırsınız? Onun da qızı qatil ərin qurbanı olmuşdu. Həm də ana olduqdan bir neçə gün sonra. Aktrisa ömrünün sonuna kimi özünü ovudaraq yaşadı. Çünki qızının əmanəti olan körpəni böyütməliydi.

Bu yazını yazanda daha bir kişinin 21 yaşlı həyat yoldaşını qətlə yetirdiyini eşitdim. Qətlin səbəbi hələ bəlli deyil, amma çox güman ki, eyni ssenariylə qarşılaşacağıq “...O mənim üstümə bağırdı və söydü...”

Məsələ burasındadır ki, qatilə çevrilən bu şəxslər öz əməllərindən peşmanlıq hissi də duymurlar və özlərinə bəraət qazanmaq üçün qurbanlarına olmazın iftiralar atmaqdan çəkinmirlər.

Həyat yoldaşını boğub pəncərədən atmış narkotik istifadəçisi olan şəxsin məhkəməsi barədə yazını oxudum. Qeyd edim ki, qətlə yetirilən qız xaricdə təhsil almışdı, ziyalı ailənin övladıydı. Məhkəmədə gözüyaşlı ananın ifadəsini dinləyən qatil kürəkən tez-tez onun sözünü kəsirmiş: “Xahiş edirəm, düz danışın, axı burda söhbət mənim taleyimdən gedir!”

Deməli, gözəl bir qadını həyatdan məhrum edib iki azyaşlı uşağı anasız, ahıl ata-ananı gözüyaşlı, övladsız qoymuş bu şəxsin həyatı özü üçün bu dərəcədə qiymətliymiş!

Odur ki, “bütün dünyanı qadınlara verməyə” ehtiyac yoxdur, sadəcə onun öz həyatına sahib çıxmasına imkan verin, bu yetər.

REKLAM

Yazarın digər yazıları

Xəbər lenti

Aygün Fətullayeva: "İstənilən rola çəkilərəm" - Video
21:02 25 Sentyabr 2020
Bakı caz festivalı yubileyini qeyd edəcək
18:50 25 Sentyabr 2020
Natali Portman kitab yazdı
18:15 25 Sentyabr 2020
AzTV “Diriliş Ərtoğrul” serialını yayımlayacaq
17:30 25 Sentyabr 2020
Məşhur rəssamın tablosu 80 milyon dollara satılır
17:02 25 Sentyabr 2020
Nobel mükafatının məbləği artırılacaq
16:25 25 Sentyabr 2020
Arvadını döyən tənha ata, öz qaynını sevən Həqiqət – Səriyyə xalaya çətin suallar gəldi
15:47 25 Sentyabr 2020
Qardaşlarından küsüb evdən getdi, ərli qadına aşiq oldu, dünyadan subay köçdü…– Maraqlı faktlar
15:08 25 Sentyabr 2020
"Salnaməfilm" Milli Qəhrəmanlar haqqında film çəkir
14:30 25 Sentyabr 2020
"YARAT”da sərgi
13:53 25 Sentyabr 2020
Paşinyanın arvadını neyləyəcəyik? – Sərdarın yazısı
13:10 25 Sentyabr 2020
Senatdan uyğurlarla bağlı şok təklif
12:31 25 Sentyabr 2020
Çingiz Abdullayevin gözə kül üfürməyi – Mirmehdi Ağaoğlu yazır...
11:51 25 Sentyabr 2020
Seymur Baycandan yeni kitab
11:13 25 Sentyabr 2020
Yekə döşlər, iri budlar? – Firuz Mustafa yazır...
10:40 25 Sentyabr 2020
Fəxrəddin Manafov xəstəxanaya aparılıb
10:00 25 Sentyabr 2020
Hər yanımdan məftillər sallanırdı - Bircənin romanı
09:00 25 Sentyabr 2020
“Qara dul qadın” filminin premyerası təxirə salındı
18:41 24 Sentyabr 2020
Bəxtin gətirmirsə, deməli...
18:04 24 Sentyabr 2020
Mən ki Allah deyiləm, uşaqları aldadım... – Yeni imza
17:25 24 Sentyabr 2020