Kulis.az Qalib Şəfahətin yeni şeirlərini təqdim edir

Bizim oyunumuz

Barmaqların

Elə ölüdür ki,

Qəlbimə nə qədər

Döysən də,

Nağara çubuqları kimi,

Sən istəyən havanı çalmayacaq.

Nə sənin sümüyünə düşəcək,

Nə də ki, mənim.

Nə sənin havan olacaq,

Nə də ki, mənim.

Havasızlıqdan boğulduq.

Oynamağa nə sənin həvəsin olacaq,

Nə də ki, mənim.

Bizim oyunumuz baş tutmayacaq,

Başını tutub qaçacaq.

Qorxmuram

Bir qadın gözəlliyinə

tuş gəlməkdən

qorxmuram.

Çox uzaqlara apara məni...

əvvəlcə divlə əyişəm,

sonra döyüşəm,

axırda

divin canı olan şüşəni sındıram.

Sonrasını bilmirəm,

Qaranlıq dünyaya düşəcəm

Yoxsa

İşıqlı dünyaya.

Nə ağ qoç gəlib,

Nə də qara qoç.

Hələ də gözləyirəm...

gərək

qaranlığa şam yandıram.

Kölgə

Kölgən inciyib yenə,

Düşmür ağac dibinə.

Elə bil qəsdi var,

Qəsd edir!

Həm mənə,

həm sənə,

Həm də ağac dibinə.

Utanacam

Qadın ərinin yolunu gözləyirdi,

Əri yad qadın yanında idi

Nə arvadının zənginə cavab verə bilirdi,

Nə də zəng edib gec gələcəm,

deyirdi.

Arvadı birdən soruşsa?!

Niyə gecikmisən?

Yeməyin soyuyur daha.

Onda nə deyəcəm?

Utanacam özümdən..

O yana

Kim gələcək, kim gedəcək,

Səndən, məndən o yana ki?

Kim qalacaq, kim olacaq,

Səndən, məndən o yana ki?

Bulud olub çəkiləmməz,

Yağış olub töküləmməz,

Dan yeritək söküləmməz,

Səndən, məndən o yana ki?

Çox olsa da gəlib-gedən,

Kədər-qüssə bağrın didən,

Nə sən olmaz, nə də ki, mən,

Səndən, məndən o yana ki?

Uzaq düşmüsən məndən

Bircə addımda

Ayaqlarımı kənara ata bilmirəm,

sənin xəyallarından.

Gəzib-dolaşa bilmirəm,

xəyallarından gendə.

Yoxsa şübhələnər məndən.

Xəyallarında gəzib-dolaşmayanda

Uzaqlaşıram özümdən.

Elə xəyallarınla oturub-dururam mən.

Bircə sən, bircə sən

Uzaq düşmüsən məndən...

24.08.14

• “SALAM” Beynəlxalq Uşaq və Gənclər Filmləri Festivalının açılış mərasimi keçirildi
• “Əlini tutsa sevgidir... buraxmasa taleyin” - Aqşin Evrənin yeni şeirləri
• “LAGOM” simli kvartetinin konserti olacaq