Azərbaycan Dövlət Milli Gənc Tamaşaçılar Teatrı payız tətilində uşaqlar üçün yeni tamaşalar təqdim edəcək.

Kulis.az xəbər verir ki, hər il payız tətili günlərində məktəblilərə maraqlı səhnə əsərləri təqdim edən Azərbaycan Dövlət Milli Gənc Tamaşaçılar Teatrı bu il də ənənəsinə sadiq qalır. Teatrın yaradıcı kollektivi noyabrın 16-dan 20-dək azyaşlı tamaşaçılar üçün üç fərqli uşaq tamaşası nümayiş etdirəcək.

Bu barədə teatrın mətbuat katibi Samirə Əşrəf məlumat verib.

Onun sözlərinə görə, ilk təqdim olunacaq tamaşa “Şirinlər” olacaq. Quruluşçu rejissoru Elşad Rəhimzadə olan bu səhnə əsəri ən çox Yeni il və Novruz bayramlarında maraq doğurur. Tamaşada mehriban və şən şirinlər ailəsi, eləcə də onların düşməni Qarqamelin yaratdığı macəralar təsvir edilir. Əsər uşaqlara yardımlaşma, dostluqda sədaqət və humanizm kimi dəyərləri aşılayır.

Teatr nümayiş olunacaq digər tamaşalar barədə də məlumat verib. Onlardan biri danimarkalı yazıçı Hans Xristian Andersenin eyniadlı əsəri əsasında hazırlanan “Düyməcik” tamaşasıdır. Quruluşçu rejissoru Ayla Osmanova olan bu səhnə əsəri əsasən azyaşlı tamaşaçılar üçün nəzərdə tutulub və valideynlər də övladları ilə birgə izləmək imkanı əldə edirlər.

Daha bir uşaq tamaşası isə “Cırtdanino”dur. Ssenarisi Pərvin Nurəliyevaya, quruluşu yenidən Elşad Rəhimzadəyə məxsus olan bu əsər məktəblilər üçün xüsusi olaraq hazırlanıb. Tamaşada Yer planeti və digər kosmik aləmlərdən bəhs edilir. Hadisələr məşhur nağıl qəhrəmanı Cırtdan ilə başqa planetdən gələn yadplanetli qız Nino arasındakı dostluq və onların macəraları üzərində qurulub. Səhnə əsəri milli nağıl elementlərini kosmik mövzularla birləşdirir.

Samirə Əşrəf əlavə edib ki, yaxın aylarda uşaqlar üçün daha bir tamaşa – “Büllur başmaq”–ın premyerası keçiriləcək. “Küllücə” nağılının motivləri əsasında hazırlanan səhnə əsərində ögey ana və bacıların əziyyətinə məruz qalan qızcığazın çətinliklərə dözməsi və sehrbaz qadının köməyi ilə yeni həyata doğru addımlaması təsvir olunur. Tamaşada kralın oğlu ilə tanışlıq və başmağın itməsi motivi klassik nağıl xətti ilə təqdim edilir.

Teatrın payız tətili repertuarı uşaqlar və ailələr üçün maraqlı və rəngarəng tamaşa günləri vəd edir.

• "Kənan Mahmudovun həbs olunmasını istəmirəm, amma..." - Orxan Saffaridən açıqlama
• Reabilitasiya mərkəzləri yoxsa psixoloji işgəncə sistemi?
• Bu məktəbə Elza İbrahimovanın adı verildi