Bu gün dünyada ilk dəfə Yuri Qaqarinin kosmosa uçdu]u gündür. SSRİ Ali Sovetinin 9 aprel 1962-ci il tarixli qərarı ilə 12 aprel Kosmonavtika günü elan olunub.

Kulis həmin günü xatırlayan sənət adamlarından münasibət öyrənib. Cavabları təqdim edirik.

Fikrət Qoca: “Yuri Qaqarin kosmosa uçduğu vaxt mən Moskvada oxuyub gəlmişdim Bakıya, işləyirdim. Bir yaş böyük idim ondan, 26 yaşım var idi. Bu kosmosa uçuş elmin kəşfi idi. Biz uşaq olanda göydə ulduzlara baxanda ora bizə sirli və qorxulu gəlirdi. Yuri Qaqarin kosmosa uçanda Yerin cazibəsindən çıxmışdı. Biz kosmosa bir addım da irəli getmişdik. Mən həmin gün vahimələndim açığı. Onda düşünürdüm ki, Yer kürəmizi qorumaq lazımdır. Onda təzə-təzə raketlər çıxırdı, dünyanın da pis vaxtı idi. Qorxurdum ki, Yer kürəsini dağıdacaqlar. Axı Yer kürəsi də canlıdı, onun da yaşamağa haqqı var. Bu elmi yaxşılığa doğru aparmaq lazımdır, gözəl nailiyyətlərə doğru. Əvvəlcə Yer kürəsində insanlar arasında məhəbbət yaratmaq lazımdır, sonra isə kosmosa getmək. Məhəbbəti bərpa etməsək, kosmosa yalnız nifrət apara bilərik. Ona görə də qorxurdum. Ancaq bu sovetin böyük uğuru idi, hamı da sevinirdi”.

Vaqif Nəsib: “O vaxt mən tələbə idim. Sovet İmperiyasının təbliğatına görə həmin gün Yuri Qaqarinin kosmosa uçmasına çox sevinirdik. Ancaq indi elmi tərəqqinin əleyhinəyəm. Engelsin bir sözü var, təbiət hər kəsdən intiqamını alacaq. Bu kosmosa uçuş ozon qatını zədələyir, təbiəti korlayır. Ona görə indi bu Kosmonavtika günü mənim üçün heç də sevindirici deyil”.

Mübariz Tağıyev: “SSR-nin ən gözəl vaxtları idi onda. 20-21 yaşım olardı. Mən üzgüçülüklə məşğul olurdum. Belarusiyanın Minsk şəhərində idman yarışları keçirilmişdi, bizi ora aparmışdılar. Qatarda gedirdik, radioda eşitdik ki, Yuri Qaqarin kosmosa uçub. Çox sevinclə qarşıladıq. SSRİ-nin uğuru hesab edirdilər kosmosa uçuşu. Yadımdadır ki, bir həftəyə qədər bayram keçirildi Sovet İttifaqının hər yerində.”

• Alban-Udi dini icmasının nümayəndələri Gəncəsər Monastır Kompleksini ziyarət etdi
• Xarici diplomatlar Şuşada Natəvanın, Bülbülün və Üzeyir Hacıbəylinin güllələnmiş büstlərini ziyarət ediblər
• "Resident Evil" kainatında yeni səhifə