Dekabrın 26-da "Xalq" Bankın baş ofisində Xəlil Rzanın “Xalq Əmanəti” layihəsi çərçivəsində nəşr olunan seçilmiş əsərlərinin təqdimat mərasimi keçirilib.

APA-nın məlumatına görə, təqdimat mərasimində şairin ailə üzvləri, millət vəkilləri, ədəbiyyat və mədəniyyət xadimləri iştirak edib.

Millət vəkili Nizami Cəfərov, akademik Teymur Kərimli, xalq şairi Zəlimxan Yaqub və başqaları Xəlil Rzanın həyat və yaradıcılığı haqqında çıxış edib, onu XX əsr Azərbaycan poeziyasının böyük şairi kimi dəyərləndiriblər.

Qeyd olunub ki, Xəlil Rza Ulutürk bədii-fəlsəfi fikir tariximizə təkcə şair kimi deyil, həm də alim, tərcüməçi, publisist və salnaməçi kimi daxil olub. 36 bədii, 15 tərcümə, 13 elmi, 7 memuar kitabının müəllifi olan Xəlil Rza Ulutürkün bədii-publisistik, elmi-fəlsəfi irsinə həsr olunmuş 9 kitab nəşr edilib.

Topluda şairin müxtəlif illərdə qələmə aldığı seçilmiş əsərləri və ədəbi tərcümələri yer alıb.

Əsası 2010-cu ildə qoyulan “Xalq Əmanəti” layihəsi çərçivəsində Xalq rəssamları – Böyükağa Mirzəzadə, Maral Rəhmanzadə, Səttar Bəhlulzadə, Mikayıl Abdullayev, Xalidə Səfərova və Mahmud Tağıyevin əsərlərinin yer aldığı bədii albomlar nəşr olunub və sənətkarların rəsmlərindən ibarət sərgilər təşkil edilib. Xalq şairləri Məmməd Arazın, Hüseyn Arifin və Mikayıl Müşfiqin seçilmiş əsərləri çap edilib.

Layihənin rəhbəri Rafiq Həşimov, tərtibçisi və redaktoru Yusif Günaydın, məsləhətçisi Firəngiz Ulutürk, layihənin redaktoru Səlim Babullaoğludur.

• "Heç bir mesajı yoxdur, ortabab mətndir..." - Hekayə müzakirəsi
• Körpə - Alberto Moravianın hekayəsi
• Allahverdi Əsədov: "Ermənilər buna görə mənim başıma pul qoymuşdular" - Müsahibə