ABŞ-da nəşr olunan “Foreign Affairs” jurnalı İranın ali dini lideri, ayətullah Seyid Əli Xamneyi bir sıra xüsusiyyətləri ilə bağlı məqalə dərc edib. APA-nın Türkiyə mətbuatına istinadən verdiyi məlumata görə, “Qərb dəyərlərinin İranı zəhərlədiyi” istiqamətindəki çıxışları ilə tanınan ayətullah Xamneyinin Qərb ədəbiyyatının pərəstişkarı olduğu ortaya çıxıb.

2000-2006 illər arasında Tehranın Evin həbsxanasında cəza çəkmiş və hazırda mühacirətdə yaşayan iranlı müxalif jurnalist Əkbər Gəncinin qələmə aldığı yazıda İranın ali dini liderinin Qərb ədəbiyyatına olan sevgisi nəzərə çarpır. Hətta onun ən çox sevdiyi fransız yazıçı Viktor Hüqo olduğu üzə çıxıb.

Ə. Gənci öz məqaləsində ayətullah Xamneyinin 2004-cü ildə bir çıxışı zamanı Viktor Hüqo üçün belə dediyini yazıb: “Məncə, Viktor Hüqonun “Səfillər”i tarixdə yazılmış ən yaxşı romandır. Təbii ki, bu günə qədər yazılmış bütün kitabları oxumadım. Ancaq müxtəlif əsrlərdə yazılmış bir çox roman oxudum. Köhnə romanlar da oxudum. Məsələn, “İlahi komediya”, “Min bir gecə nağılları”... Amma “Səfillər” roman öz əsrində bir möcüzədir. Təkrar, təkrar söyləyirəm, “Səfillər”i bir dəfə oxuyun. “Səfillər” sosioloji, tarix və tənqid kitabıdır. İlahi bir kitabdır. Eşq və duyğunun kitabıdır”.

Məqalədə İranın ali dini liderinin yerli yazıçılar Məhəmməd Əli Camalzadə, Sadiq Çubək və Sadiq Hidayəti də bəyənərək oxuduğu, rus yazıçılar Mixail Şoloxov və Lev Tolstoyla Onore de Balzak və Mişel Zevaconun da onun sevdiyi yazıçılar arasında olduğu vurğulanıb.

Bundan əlavə, ayətullah Xamneyinin sevdiyi digər əsərlər arasında Harriyet Biçer-Stounun “Tom dayının daxması” və Con Steynbekin “Qəzəb salxımları” da var.

• Qaranlıq gecədən soruş... - Günün şeiri
• "Varlı olmaq istəyirsinizsə..." - Amerikalı yazıçının məşhur bestsellerindən sitatlar
• Xalq yazıçısı Anar orada tək oturmayıb... - FOTOYADDAŞ