Yazıçı Cəlil Cavanşirin “Hədəf” nəşriyyatında yeni kitabı işıq üzü görüb. Bu barədə Kulis.Az-a müəllif özü məlumat verib: “Yeni kitabım “Dinlər, təriqətlər, peyğəmbərlər” adlanır. Kitaba qeyri-ənənəvi dinlər və təriqətlər, saxta peyğəmbərlər və batil inanclar haqqında zaman-zaman Kulis.Az saytında çap olunan araşdırmalarım daxil edilib. Kitab din haqqında maraqlı məlumatlar əldə etmək istəyən oxucular üçün nəzərdə tutulub. Kitabda səmavi dinlərdən sonraya ortaya çıxan, daha çox islamı təhrif üzərində qurulan dinlərin yaranması, inkişafı haqqında maraqlı məlumatlar var. Eyni zamanda islamdakı bəzi təriqətlər haqqında da araşdırmalarımı bu kitaba daxil etmişəm.”

Müəllifin onu da bildirib ki, kitabın çap olunması ilə bağlı təşəbbüs “Hədəf” nəşriyyatından gəlib: ““Hədəf” nəşriyyatı ilə uzun müddətdir ki, əməkdaşlıq edirəm. Bu nəşriyyatda iki tərcümə kitabım işıq üzü görüb. Eyni zamanda nəşriyyatda çap olunan bir neçə kitabın redaktoruyam. Kitabın ərsəyə gəlməsində əziyyəti olan bütün dostlara təşəkkür edirəm”.

Kitabın redaktoru və ön sözün müəllifi yazıçı Müşfiq Xandır.

300 tirajla çap olunan “Dinlər, təriqətlər, peyğəmbərlər” kitabının qiyməti 3 manatdır.

• "Hamı necə, biz də elə: çaxçux, dvijeniya..." - Yalçın İslamzadə
• "Kinomexanikin qayıdışı" daha bir mükafat aldı
• Sevgilisi ilə birgə ərini öldürən qadın - Hamamda ölü tapılan reklam qurbanı kim idi?