Xalq yazıçısı Elçinin eyni adlı əsəri əsasında ekranlaşdırılmış “Mahmud və Məryəm” əsərinin Almaniyanın paytaxtında premyerası keçirilib. Kulis.Azın Türkiyə mətbuatına istinadən verdiyi xəbərə görə filmin ilk premyerası martın 18-də İstanbulda keçirilmişdi.

Premyerada filmin baş rollarını oynayan aktyorlar Aras Bulut İynemli və Eva Dedova ilə bərabər İlker Kızmaz və Tomris İncer də qatılıb.

Ekran əsəri Azərbaycan və Türkiyə arasında ilk müştərək kino layihəsidir. Türkiyənin “24 Kare” şirkəti tərəfindən ekranlaşdırılan film Mahmudla Məryəmin sevgisindən bəhs edir. Mahmud gəncəli Ziyad xanın oğlu, Məryəm isə keşiş qızıdır. Hadisələrin mərkəzində isə Mahmudla Məryəmin bir-birinə olan məhəbbəti dayanır. İki gəncin sevgisinə mane olan isə mürtəce fikirli Qara Keşişdir.

Nağıl və fantastik elementlərin vəhdət təşkil etdiyi filmdə Mahmud rolunu Aras Bulut İynemli, Məryəm obrazını isə Eva Dedova canlandırıb. Çəkilişlərə Şəki şəhərində start verilən ekran əsərində Fəxrəddin Manafov, Məlahət Abbasova, Şamil Süleymanov, Mehmet Çevik, Tomris İncer, Kristina Krapela və digər tanınmış aktyorlar rol alıb. Mehmet Ada Öztekinin rejissorluğu ilə lentə alınan filmin çəkilişləri ötən il aparılıb.

Azərbaycan və Türkiyənin birgə istehsalı olan və yazıçı Elçinin ssenarisi əsasında ekranlaşdırılan “Mahmud və Məryəm” filminin çəkilişləri Azərbaycan və Türkiyədə aparılıb.

“Mahmud və Məryəm” filminin İstanbul və Berlin şəhərlərində premyeraları keçirilsə də hələ Azərbaycanda keçirilməyib.

• İbrani Bibliyasının ilk nüsxəsi, axirətə keçmək üçün sehrli mətnlər toplusu... - Dünyanın 7 qədim əlyazması
• Ukraynalı rəssamlardan müharibə əleyhinə sərgi
• Qarabağ abidələri İslam Dünyası İrs siyahılarına daxil edildi