"Kann" film festivalının idarə heyəti rejissor Lars fon Trierin üzərindən “non qrata” statusunu götürüb. “Scren Daily”nin verdiyi xəbərə görə, festivalın bədii rəhbəri Tyerri Fremo L. Trieri həmişəlik “non qrata” elan etmədiklərini bildirib: “Bu ancaq 2011-ci il üçün keçərli idi”.

L. Trierin “Nimfoman qız” filmini izləmədiyini söyləyən T. Fremo film tamamlandıqdan sonra rejissorun filmi festivala göndərəcəyi təqdirdə bu məsələyə baxacaqlarını da qeyd edib.

L. Trierin “non qrata” elan olunması 2011-ci ildə Kannda “Melanxoliya” filminin nümayişi ərəfəsində baş verib.

Mətbuat konfransında Trier antisemit olmadığını, amma Adolf Hitlerə simpatiya bəslədiyini və müəyyən mənada özünü nasist hesab etdiyini söyləmişdi. L. Trier sonradan üzr istəyərək bunun zarafat olduğunu bildirmişdi. Lakin "Kann" İdarə heyəti rejissoru “non qrata” elan etmiş və fikirlərini kəskin pisləmişdi.

2011-ci ilin avqustunda Fransa məhkəməsi L. Trieri “nasist cinayətlərinə haqq qazandırmaqda” ittiham edərək haqqında cinayət işi açıb. Danimarka polisi tərəfindən dindirilən L. Trier haqqında işə 2011-ci ilin dekabrında xitam verilib.

Qeyd edək ki, sayca 66-cı dəfə təşkil olunacaq "Kann" film festivalı 2013-cü il 15-26 may arasında keçiriləcək. Festivalı Lurmanın “Möhtəşəm Qetsbi” filmi açacaq.

• Kimi alçaldıb Nigar xanım? Kimi təhqir edib? Xəstəsiniz? - Ömər Xəyyam
• Məşhur bakılı Tokio həbsxanasında - Mirzə Alik
• "Kurtlar vadisi"nin rejissoru Osman Sınav vəfat etdi