Jurnalist və tərcüməçi Azər Həsrətin ilk iri həcmli “Bir əsgərin yaşantıları” memuar-romanı “Qanun” nəşriyyatında min tirajla çap olunub. Kitab bədii üslubda qələmə alınsa da təsvir edilən olaylar və obrazların, demək olar ki, hamısı gerçəkləri əks etdirir.

Kitabın əsas mövzusu yazarın 1986-88-ci illər ərzində Almaniyadakı Sovet Qoşunları Qrupu tərkibində hərbi xidmət keçdiyi zaman şahidi olduğu olaylar, xüsusən də azərbaycanlı əsgərlərin gizli təşkilatlanması, nizamlı bir şəkildə hər həftə sonu keçirilən Millət Məclisinin fəaliyyətləridir. Burada həm də 1987-ci ildə SSRİ Nazirlər Kabineti sədrinin 1-ci müavini olan Heydər Əliyevin vəzifəsindən uzaqlaşdırılmasının Almaniyada hərbi xidmət keçən azərbaycanlı əsgərlərə necə təsir etməsi, bir qazax əsgərin dilindən 1986-cı ilin 16 dekabr günü Almatı şəhərində Sovet qoşunlarının dinc nümayişçilərə divan tutaraq 172 nəfəri öldürməsi, yazarın ilk dəfə Türk kimliyini dərk etməyə başlaması, ermənilərin 1918-ci ildə Qubada törətdiyi soyqırım kimi təzahürlərə geniş yer verilib.

Yazar zaman-zaman xəyal aləminə də ekskurs edib və öz uşaqlığını, məktəb illərini, ailəsinin ayrı-ayrı fərdlərini göz önünə gətirərək romanı 1986-88-ci illər çərçivəsindən çıxarmağa da çalışıb.

Kitabın qiyməti 4 manatdır.

• Məryəm bu dünyaya sevmək üçün gəlmişdi - Elçin
• Bu da “Avroviziya” mahnımız - Video
• Narkotik ittihamı ilə saxlanılan Həsən Ağa həbsdən buraxıldı