Kulis.az Xosrov Natilin “Markesə Məktub” şeirini təqdim edir.

1

Cənab Markes

Mən sağam

Ümid Allaha qalıb.

Ayağını bərk dirə

Yüz il də tənha qalıb.

Kaş ki, yurdsuz olmasın

Bir kəsəyi, bir daşı,

Sənə məktub yazıram

Mən yüz ilin bir başı.

Yurdumu yağmaladı

Bu erməni, bu yezid.

Nə imam övladıyam

Nə də Mehdi Bəyazid.

Sizdə havalar necə,

Ümid qıtlığı varmı,

Havasız bir ürəyə

Yüz dərd birdən sığarmı?

Nisyə mal buraxırmı

Sizin apteklər.

Tökülən göz yaşını

Deyirmi sinoptiklər.

Bu günün qaraltısı

Sabah ömür yolumda

Sevilmədən bəlkə də

Evlənəcək oğlum da.

Bir sevgili zamanda

Bəlkə yurda dönəcəm

Gözünə su ver, dostum,

Bir gün mən də öləcəm.

2

Cənab Markes, yenə mənəm

Ölməmişəm, hələ sağam

İstintaqda qərar verdim

Sənə məktub yazacağam.

Heç bir gün də çəkmədi

Məhbəsə salınmağım.

Sən deyən bir şey deyildi

Göz altına alınmağım.

Guya ki, mən ötən gecə

Balıqlara su vermişdim

Ertəsi gün uçan quşa

“Qa” deyəndə “qu” vermişdim.

Guya ki, mən buludları

Doğramışam ərsin-ərsin

Yağmurlu gün gül əkmişəm…

Eh, nə isə, boş ver getsin.

3

Qoca Qarsiya,

Sən xocalılı, ya şuşalı

Ya da elə ağdamlı ola bilərdin

Sən Zəngilanda da, doğula bilərdin

İrəvandan da qovula bilərdin.

Cəbrayıl ola bilərdin

Qaraş ola bilərdin

Mərkəz ola bilərdin

Amma Qabriel Qarsiya

Markes ola bilməzdin.

Eh, qoca Qarsiya

əlindən alardılar yüz ilin tənhalığını

sən yaza bilməzdin sevincin,

gözlənilən bir qətlin tarixini,

kədərin qansızlığını.

Kümənə od vurub

Yandırardılar

əlyazmalarını

Əlindən alardılar adamlığını,

Burnundan gətirərdilər zəngilanlı,

qubadlı, cəbrayıllı olmağını

yaxud ağdamlılığını.

Cəbrayıl ola bilərdin

Qaraş ola bilərdin

Mərkəz ola bilərdin

Hər Kəs ola bilərdin

Qabriel Qarsiya Markes ola bilməzdin.

4

Cənab Markes, bu mənəm

Hələ ki, salamatam

Sənin de sağlığını

bir olan Allahdan

istədim, atam

cənab Markes

oxudum "...gozəlçələrini "

kiminsə tərcüməsində

bu mövzunu hər kəs xoşlar yəqin ki,

Çilovdan yazıram yazdıqlarımı

Helikopterlə uçub gəlirəm

həftədə bir kərə

Çilov adasından Pirallahıya

ordan şəhərə

və

Hər gün qulaqlarımda helikopter səsi

Cənab Markes

Çilovdan yazıram yazdıqlarımı

Üç ildi əlimə qələm almıram,

üç ildi yazmıram bir misra belə

İşimi dəyişmişəm-il yarım tamam oldu

sağlımı görüm...

Qadınım öldü.

Cənab Markes

mən sağam

Yaşım 55 olur qasım ayında

Və hər gün qulaqlarımda helikopter səsi

5

Sən yoxsan demək

uzaq Kolumbiyada

qəbrinin üstünü lalələr səpmək

imkan xaricində

Qarabağda

lalələr açıb indicə...

• "Görsünlər, ağlamaq necə olurmuş..." - Hafiz Hacxalılın yeni şeirləri
• Xalq artistinin oğlu: "İllər sonra atamın qulağını kəsdiyi adamla rastlaşdım..." - Müsahibə
• Harri Potterin müəllifi Coan Katlin Roulinq kimdir?