Xəbər verdiyimiz kimi, Xalq yazıçısı Elçinin AYB-nin Natəvan klubunda keçirilən görüşündə aparıcılıq edən Azərbaycan Yazıçılar Birliyinin sədri Anar Rzayev AMEA-nın müxbir üzvü, tənqidçi-ədəbiyyatşünas Tehran Əlişanoğlunu sərt tənqid etmişdi.

O, tədbirin sonunda cibindən çıxardığı qeydlərdən konkret misallar çəkərək T.Əlişanoğlunun yazılarının dilindən və məntiqi anlaşılmazlığından gileylənmiş, iradları auditoriyada gülüş dalğası yaratmışdı.

Tədbirdə iştirak edən tənqidçi Tehran Əlişanoğlu tənqidləri susqunluqla qarşılasa da sonradan öz Facebook profilində Anar müəllimə cavab verib. Həmin cavabı diqqətinizə çatdırırıq:

“Dünən uzun illərdən sonra şeytanın qıçını qırıb AYB-nin Natəvan klubuna getdim. Elçinin tənqid haqqında məruzəsini dinləmək üçün. Allah şahiddir, bir kənarda oturub, heç müzakirələrə də qatılmadım. Amma necə oldusa, tədbirin lap sonunda xətrini istədiyim və xətrimi çox istədiyini deyən Anar müəllim qoltuq cibindən bir vərəq çıxarıb, “Ədəbiyyat qəzeti”ndə gedən yazılarımdan bir neçə cümlə oxudu və tənqid adına tənqid etdi. Doğrusu, xoşhal oldum. Belə.

…Xoşhal oldum. Amma Anar müəllimin həmən bu tənqidində iki məqam məni diksindirdi. Birisi budur ki, AYB hələ də Azərbaycan ədəbiyyatı haqqında nə və necə düşünməyi, yazmağı öyrətmək həvəsində davam edirmiş. Vallahi, müxbir üzv də oldum, yenə öyrədirlər. Hərçənd bunun bir qorxusu yox; əvvəl necə vardımsa, elə də yazıram. İkinci məqam daha çox təşviş doğurdu məndə. Belə bir hökm qulağımı çaldı ki, bəs məqaləni çap edən redaktor hara baxır? Yenədəmi senzura? Yenədəmi “Ədəbiyyat qəzeti”nin vəfalı ayaz dövrü? Eləməyin, cənablar! Lütfən...”

• Arif Acaloğlu baltanı dibindən vururdu...- Muxtar Kazımoğlu
• "O yas məclisində hamı mənə baxırdı, mən isə gülürdüm..." - Xalq şairi niyə o qadını kirvə tutmaq istəyirdi?
• Vüqar Camalzadə "Üzbəüz" layihəsinin qonağı olub