“Kitab otağı” layihəsinin təqdimatı keçiriləcək.

Kulis.az xəbər verir ki, 28 iyun, saat 14-də Beynəlxalq Mətbuat Mərkəzində şair Şəhriyar Del Geraninin “Kitab otağı” layihəsinin təqdimat mərasimi baş tutacaq.

Azərbaycan Dövlət Tərcümə Mərkəzinin təşkilati dəstəyi ilə gerçəkləşdiriləcək layihənin əsas məqsədi insanlarda kitaba, ədəbiyyata marağın artırılması, bu sahədə geniş təbliğat kampaniyasının aparılmasıdır. Layihənin təşəbbüskarları vaxtilə az qala hər evdə olan “kitab guşəsi” ənənəsini bərpa etmək, ədəbiyyatın xalqa çatdırılması, bədii zövqün formalaşdırılması, yüksək dəyərlərin təbliği istiqamətində mühüm işlər görmək niyyətindədirlər.

Layihə kitab mağazalarından perik düşmüş oxucunu artıq unudulmuş ünvanlara səsləməyəcək, “Kitab otağı” özü oxucunun yanına gedərək kitabı təbliğ edib, sevdirəcək. Beləliklə, əvvəllər mövcud olmuş “kitab guşələri” müasir və geniş “kitab otaqlarına” çevriləcək.

Layihəyə Şəhriyar Del Geraninin yeni şeirlər kitabı olan “Gecəniz şeirə” ilə start veriləcək. Daha sonra layihə çərçivəsində Azərbaycan və dünya ədəbiyyatının həm klassik, həm də çağdaş nümunələrini xalqa tanıdıb, sevdirmək üçün rayon mərkəzlərindən tutmuş ən ucqar kəndlərə qədər ölkənin bütün bölgələrinə səfərlər təşkil ediləcək, görüşlər keçiriləcək.

Media qurumları və ədəbiyyatsevərlər sözügedən layihənin məram və məqsədini açıqlamaq, bu vacib missiyanı geniş ictimaiyyətə çatdırmaq məqsədilə keçiriləcək mətbuat konfransına dəvətlidirlər.

• "Rus ruleti" oynayan ingilis yazıçı - Fidel Kastro Qrinin hansı romanını bəyənməmişdi?
• Azərbaycanlı rəssamın əsəri İtaliyanın nüfuzlu jurnalında
• Vətən müharibəsi qazisi: "Şuşada şəhid və yaralıları Henrix Mxitaryanın villasına toplamışdıq" - Müsahibə