"Penguin Random House" nəşriyyat evi Mario Püzonun varisləri tərəfindən təsdiqlənmiş və Adriana Trijiani tərəfindən qələmə alınacaq yeni "Xaç atası" romanının müəllif hüquqlarını əldə edib.

Kulis.az Lent.az-a istinadən xəbər verir ki, "Connie" (Konni) adlanan kitabın 2027-ci ildə işıq üzü görməsi planlaşdırılır.

Süjetin mərkəzində filmlərdə Taliya Şayrın canlandırdığı və tamaşaçılara yaxından tanış olan Konni Korleone obrazı yer alacaq. O, Maykl Korleonenin bacısı və saqanın əsas, lakin uzun müddət kölgədə qalmış (layiqli qiymətini almamış) aparıcı qadın personajlarından biri idi.

Trijianinin sözlərinə görə, roman kişilərin hökmranlıq etdiyi bir dünyada öz həyatını qurmağa və eyni zamanda ailəsinə sadiq qalmağa çalışan bir qadının hekayəsindən bəhs edəcək.

Yazıçı qeyd edir ki, bir çox insan Korleone ailəsinin qadınlarının gücünü və təsirini lazımi qədər qiymətləndirmir və bu, böyük bir səhvdir: "İnsanlar Don Vito Korleone və Maykl Korleoneni layiqincə qiymətləndirmirdilər və bunu öz riskləri hesabına edirdilər. Eyni qayda Konni Korleoneyə də aid edilməlidir".

Yeni roman, Mario Püzonun irsi tərəfindən rəsmən bəyənilən "Xaç atası" kainatındakı üçüncü rəsmi kitab və bir qadın tərəfindən yazılmış ilk əsər olacaq.

Artıq layihənin, orijinal filmlərin istehsalçısı olan "Paramount Pictures" studiyası tərəfindən ekrana uyğunlaşdırılması (ekranlaşdırılması) imkanları müzakirə edilir. Lakin adaptasiyanın detalları hələlik açıqlanmır.

İtalyan-amerikan irsi haqqında yazdığı bestsellerlərlə tanınan yeni romanın müəllifi Adriana Trijiani, Püzonun varisləri tərəfindən saqadakı yetərincə işıqlandırılmamış qadın personajları barədə yazdığı essedən sonra seçilib.

Yazıçının oğlu və irsinin idarəçisi Entoni Püzonun sözlərinə görə, Trijianini layihəyə cəlb etmək ideyası onun "Korleone ailəsinin qadınları haqqında nə qədər az şey məlumdur" fikrindən sonra yaranıb.

Varislər əmindirlər ki, yeni kitab təkcə orijinal romanın pərəstişkarları üçün deyil, həm də Korleone ailəsinin tarixini tamamilə fərqli bir bucaqdan görmək istəyən yeni oxucu nəsli üçün maraqlı olacaq.

• Marlon Brandonun həyatını dəyişən rol – “Sahildə” filminin gizli hekayəsi
• Qara keşişdən Kürmükə: "Sonuncu alban" necə öldü? - ŞƏRH
• Bir mühacirin kitabı sovet Bakısına necə sızdı? - Cavidin Vaşinqtondakı barelyefinin arxasındakı şuşalı