"Tinder sosial şəbəkəsində müxtəlif xanım adları ilə profillər açaraq əks cinsin nümayəndələrinə tanışlıq məqsədilə yazaraq tanış olurlar. Tanışlıq baş tutduqdan sonra isə "Azdrama"ya aid saxta keçidi göndərərək "tamaşaya birlikdə gedək" adı ilə bilet almasını istəyirlər".

Kulis.az xəbər verir ki, bunu İT mütəxəssisi Rəşad İbrahimov özünün feysbuk hesabında paylaşım edib.

Onun sözlərinə görə, vətəndaş kart məlumatlarını daxil etdiyi təqdirdə kart məlumatlarını götürür və kartda olan vəsaitləri mənimsəyirlər: "Keçidi yoxladım, keçid mütəmadi olaraq yenilənir və həmişə olduğu kimi dələduzlar Azərbaycanda deyil.Ən gülməli tərəfi isə ondan ibarətdir ki, "Azdrama"nın rəsmi veb səhifəsinin nüxsəsini çıxarıb tərcümə edib saxta veb səhifə yaradıblar. Tərcümədə google translate səhvə yol verdiyi üçün sıra sözünü "yataq "sözü olaraq tərcümə edib".

Teatrın mətbuat xidmətindən Kulis.az-a verilən məlumata görə, teatr artıq Beynəlxalq kibercinayətkar qrupun dələduzluq əməlləri ilə bağlı ictimaiyyətə müraciət edib. Müraciətdə bildirilir ki, beynəlxalq kibercinayətkar qrup saxta yolla yaratdığı https://theatre-azdram.com/azb/events domenli sayt vasitəsi ilə onlayn şəkildə insanlara tamaşa biletləri təklif edir:

“Saytın domenində olan "azdram" sözü insanlarda çaşqınlıq yaradır ki, guya tamaşalar qeyd olunan tarixdə Akademik Milli Dram Teatrında oynanılacaq. 50 manata təklif olunan onlayn bileti almaq üçün qarşı tərəfdən hesab nömrəsinin məlumatlarının daxil edilməsi tələb olunur. Bu yolla məlumatlar əldə olunur və cinayətkar şəbəkə tərəfindən vəsait mənimsənilir. Təəssüf ki, aldanan vətəndaşlar var. Akademik Milli Dram Teatrının rəhbərliyi diqqətinizə çatdırır ki, Komediya Teatrı adı ilə təqdim olunan bu müəssisənin bizimlə heç bir əlaqəsi yoxdur. Məsələ ilə bağlı Azərbaycan Respublikasının Rəqəmsal İnkişaf və Rabitə Nazirliyinə müraciət olunub”.

• Türkiyəli ssenarist vəfat etdi
• "Ulduzlu gecə", "Kartof yeyənlər" – Vinsent van Qoqun 5 əsəri
• Gecələr yuxuma girərdi Allah - Adil Mirseyid