AMEA Mərkəzi Kitabxanasında şair-publisist, Qərbi Azərbaycan İcması Müşahidə Şurasının üzvü, deputat Musa Urudun müəllifi olduğu “Qərbi Zəngəzur toponimlərinin izahlı lüğəti” adlı kitabının təqdimatı keçirilib.
Kulis.az APA-ya istinadən xəbər verir ki, Musa Urud bildirib ki, kitabı Azərbaycanın qədim mədəniyyət və dövlətçilik mərkəzlərindən biri hesab olunan Qərbi Zəngəzur bölgəsinin toponimlərinin sistemli tədqiqinə həsr edib.
O qeyd edib ki, nəşrdə qədim dövrlərdən müasir dövrə qədər müxtəlif mənbələr, sənədlər, kameral təsvirlər, elmi ədəbiyyat və xəritələr, həmçinin yerli sakinlərin məlumatları əsasında bölgənin toponimlərinin tarixi, etimologiyası və mədəni-etnoqrafik mənzərəsi araşdırılıb: “Eyni zamanda, XX əsrin 30-cu illərindən başlayaraq Ermənistanda toponimlərin məqsədli şəkildə dəyişdirilərək erməniləşdirilməsi prosesinin xronologiyası da təqdim olunub”.
Azərbaycan Milli Elmlər Akademiyasının prezidenti, akademik İsa Həbibbəyli qeyd edib ki, kitab Prezident İlham Əliyevin dilin daxili imkanları hesabına zənginləşdirilməsi istiqamətində qarşıda qoyulan vəzifələrin həyata keçirilməsi baxımından atılmış mühüm addımdır.
Qərbi Azərbaycan İcmasının sədri Əziz Ələkbərli deyib ki, lüğətdə Zəngəzur mahalının Azərbaycanın tarixi torpaqları olduğu təsbit olunub: “Bu kimi kitablarla öz tarixi torpaqlarımıza mənəvi cəhətdən qayıdırıq və fiziki cəhətdən də qayıdacağıq. Çünki o torpaqlar bizim tarixi torpaqlarımızdır”.
Sonra Qərbi Azərbaycan İcmasının Ağsaqqallar Şurasının sədri, akademik Əhliman Əmiraslanov, Elm və Təhsil Nazirliyi Coğrafiya İnstitutunun baş direktoru Zaur İmrani, AMEA-nın müxbir üzvü Elşad Qurbanov, professor İsrafil İsmayılov, AMEA Tarix İnstitutunun Qərbi Azərbaycan tarixi şöbəsinin müdiri, Qərbi Azərbaycan İcması İdarə Heyətinin üzvü, professor Cəbi Bəhramov və filologiya üzrə fəlsəfə doktoru Elçin İsmayılov çıxış edərək kitabın elmi və tarixi əhəmiyyətindən bəhs ediblər.
Qeyd edək ki, Musa Urud Azərbaycan Respublikası Milli Məclisi Toponimiya Komissiyasının üzvüdür və təqdim olunan nəşr müəllifin Zəngəzurun tarixinə həsr etdiyi yeddinci tədqiqat əsəridir. Kitab bölgənin tarixi, toponimiyası və mədəni-etnik xüsusiyyətləri ilə maraqlanan alimlər, tədqiqatçılar, tələbələr və geniş oxucu auditoriyası üçün nəzərdə tutulub.
Xatırladaq ki, 316 səhifəlik nəşrin elmi redaktoru İsa Həbibbəyli, rəyçiləri siyasi elmlər doktoru, professor Hikmət Məmmədov, filologiya üzrə fəlsəfə doktoru Əziz Ələkbərli və coğrafiya elmləri üzrə fəlsəfə doktoru Mahirə Abbasovadır.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
