Ölkədə ilk dəfə qatarda kitab təqdimatı keçirilib. "Parlaq İmzalar" nəşriyyatı yeni nəşr etdiyi "YOLDAŞ" seriyasının təqdimatını “Azərbaycan Dəmir Yolları”nın dəstəyi ilə Bakı-Gəncə-Bakı qatarında həyata keçirib. Təqdimatda oxucular, kitab və səyahət blogerləri iştirak edib.

Bu maraqlı təqdimatla bağlı nəşriyyatın rəhbəri Nurman Tariq fikirlərini “Kulis.az”a bildirib:

“İnsanların yollarda itirdiyi vaxtları dəyərləndirmələri və qazanca çevirmələri üçün dünya ədəbiyyatının "qısa və mükəmməl" əsərləri sırasından seçib nəşr etdiyimiz "YOLDAŞ" seriyasını məhz yolda təqdim etmək istədik. Əyani olaraq göstərmək istədik ki, ən yaxşı yol yoldaşı kitablardır.

"Kitab qatarı"nda oxucularımızdan, kitab və səyahət blogerlərindən, əməkdaşlarımızdan ibarət təxminən qırx nəfərlik bir heyətlə səyahət etdik. Təqdimatla yanaşı qatarda əyləncə proqramaları, musiqi ifaları, müxtəlif maraqlı seminarlar da baş tutdu. “Zəfər” bayramına təsadüf edən səyahətimiz çərçivəsində, eyni zamanda Gəncə turu da təşkil etdik, Gəncəmizin görməli yerləri ilə tanış olduq, eləcə də erməni terrorundan zərər çəkmiş yerlərə də baş çəkib əziz şəhidlərimizi yad etdik. Xoş xatirəsi uzun müddəti davam edəcək bu proses ümumilikdə 14 saat çəkdi və bu vaxtın necə gəlib-keçdiyini, doğrudan da, heç birimiz hiss etmədik. Bu səyahət həm də kitabın fərqli-fərqli insanları necə doğmalaşdıra biləcəyini göstərdi. “Kitab qatarı” adlandırdığımız bu layihəni davam etdirmək niyyətindəyik.”

• Bəstəkar Elmir Mirzəyevin kitabı Almaniyada nəşr edildi
• O, Qarabağın ermənilərə verilməsinin qarşısını necə aldı? - Nəriman Nərimanovun ev muzeyindən reportaj
• Azərbaycanlı rəssamın əsəri İtaliyanın nüfuzlu jurnalında