Azərbaycanın Fransadakı səfirliyinin və bu ölkədə fəaliyyət göstərən Fransa-Azərbaycan Dialoqu Assosiasiyasının (ADFA) birgə təşkilatçılığı, “PAŞA Həyat Sığorta” ASC-nin dəstəyi ilə “İRS” Nəşriyyat Evinin dərc etdiyi “Gizli ölüm toxumları” kitabının təqdimatı olub.

Kulis.az xəbər verir ki, səfirliyin Parisdəki Mədəniyyət Mərkəzində keçirilən tədbirdə “İRS” Nəşriyyat Evinin baş redaktoru, ANAMA yanında İctimai Şuranın üzvü Musa Mərcanlı çıxış edərək kitab haqqında ətraflı məlumat verib. O bildirib ki, ötən əsrin 90-cı illərin əvvəlində müstəqilliyini bərpa etmiş Azərbaycan qonşu dövlətin hərbi təcavüzü ilə üzləşib. Keçmiş Qarabağ münaqişəsi barədə məlumat verən baş redaktor 5 il əvvəl torpaqlarımızın işğaldan azad edildiyini söyləyib.

O, “İRS” nəşriyyat evinin hazırladığı “Gizli ölüm toxumları” kitabını təqdim edərək, münaqişənin mənfi nəticələrinin hələ də davam etdiyini, günahsız insanların həyatlarını itirdiyini deyib. İşğaldan azad olunmuş torpaqlarda quruculuq işlərinin başladığını vurğulayan M. Mərcanlı qeyd edib ki, işğal dövründə ermənilər tərəfindən Azərbaycanın Qarabağ bölgəsində 1,5 milyon mina basdırılıb. Bu gün insanların doğma torpaqlara qayıdışına ən böyük əngəl mina problemidir. Bildirilib ki, Ermənistanın hələ də dəqiq mina xəritələrini təqdim etməyib. Hazırda genişmiqyaslı quruculuq işləri aparılan bu torpaqlarda işğal dövründə Ermənistan tərəfindən basdırılmış minalar mülki şəxslərin həyatına təhlükə olaraq qalmaqda davam edir.

Diqqətə çatdırılıb ki, nəşrdə yer alan fotolar mülki insanların üzləşdikləri mina fəlakətini aydın şəkildə əks etdirir. Bu gün mina qurbanlarının sayı 500-ə yaxındır.

ANAMA yanında İctimai Şuranın üzvü insanları bu fəlakətə biganə qalmamağa və Ermənistanı mina xəritəsini verməyə məcbur etmək üçün səslərini ucaltmağa çağırıb.

• Vəfat edən tanınmış müğənninin sirri üzə çıxdı
• Ortaq türk dilinə gedən yol, tərcüməçisiz ünsiyyət: Nadir Yalçının şərhində - Video
• Rüstəm Dastanoğlunun əsəri "Ədəbi Gürcüstan"ın yeni sayında