Bu gün Milli Xalça Muzeyində “Bir xalçanın sirri: muzey obyektlərinə yeni yanaşma” layihəsinin təqdimat mərasimi baş tutub.

APA-nın xəbərinə görə, layihənin mentoru, sənətşünas Cahangir Səlimxanov çıxışında qeyd edib ki, “Mədəni üfüqlər” müəllifin proqramına daxil olan 6 layihədən biridir.

“Bu layihə adında da qeyd olunduğu kimi, yeni üfüqlər açacaq. “Bir xalçanın sirri: muzey obyektlərinə yeni yanaşma” layihəsi Almaniya Xarici İşlər Nazirliyinin Mədəniyyət və Təhsil Təşkilatlarına Beynəlxalq Yardım Fondu, Goethe İnstitutu və digər tərəfdaşların maliyyələşdirdiyi, mədəniyyət və incəsənət xadimləri üçün nəzərdə tutulan “Mədəni üfüqlər” adlı təhsil proqramı çərçivəsində həyata keçirilir”, - qeyd edib.

Milli Xalça Muzeyinin direktoru Şirin Məlikova xalçanın muzey kolleksiyasının ən dəyərli eksponatlarından biri olduğunu deyib.

Direktor bildirib ki, videoda xalçanın həyatı nəfs şəkildə canlanır: “Biz istəyirdik ki, musiqi ilə birlikdə mistik bir video yaradaq. Düşünürəm ki, maraqlı bir layihə alındı. Seçimlər zamanı mən ilk olaraq bu xalçanı seçdim. Çünki bu xalçanın çox maraqlı tarixi var. Bu qiymətli xalça on səkkizinci əsrə aiddir. Uzun müddət erməni kolleksiyaçılardan birinin kolleksiyasında saxlanılan xalça on beş ildən artıq bir müddətdə İtaliyada saxlanılıb. Artıq bu xalça bizim muzeyimizdədir".

Layihənin kuratoru Könül Rəfiyeva bildirib ki, layihə innovativ təqdimat üsullarının sərgi məkanına tətbiqi nümunəsidir: “Bu layihə bizim üçün böyük əhəmiyyətə malikdir. Biz artıq bir ildən çoxdur ki, Cahangir müəllimlə Azərbaycan muzeylərində innovativ yanaşma üzərində işləyirik. Bu gün layihə üçün Qarabağ xalçasının seçilməsi təsadüfi deyil. Qarabağ xalçaları öz ad-sanı ilə məşhurdur. Bu layihənin davamı olacaq".

Sonra XVIII əsrə aid unikal Qarabağ xalçasının videoinstalyasiyası nümayiş etdirilib.

Qeyd edək ki, qrafik-dizayner Timur Əmirxanovun vizuallaşdırdığı videoinstalyasiya elektron musiqi prodüseri və tar ifaçısı İbrahim Babayevin “vİBrant” adlı yeni albomuna daxil olan “Muğam+” bəstəsi ilə müşayiət edilir.

• Londondakı qalereyadan Çörçillə aid qalmaqallı videoinstalyasiya yığışdırıldı
• Azərbaycan kinosunun Qəmlosu - Şöhrətin arxasındakı kədər
• "Polis müharibələri"nin aktyoru vəfat etdi