“1941”, “Body Heat”, “Diner”, “The Outsiders”, “Rumble Fish”, “9½ Weeks”, “Barfly” kimi filmlərlə tanınan aktyor Mikki Rurkun kirayə borcu səbəbilə evindən çıxarılma təhlükəsi ilə üz-üzə qaldığı iddia edilib.

Kulis.az xəbər verir ki, Los-Ancelesdə yaşayan aktyora 59 min 100 dollar məbləğində olan kirayə borcunu ödəməsi və ya evi 3 gün ərzində boşaltması üçün xəbərdarlıq məktubu göndərilib.

Bu xəbərdən sonra internetdə Mikki Rurk üçün yardım fondu açılıb. Aktyorun məlumatı daxilində başladıldığı deyilən kampaniyada təxminən 100 min dollar ianə toplanması hədəflənib.

Lakin Mikki Rurk sosial şəbəkə hesabında paylaşdığı video ilə iddiaların həqiqəti əks etdirmədiyini açıqlayıb.

Məyus olduğunu bildirən aktyor kiminsə onun adından kampaniya təşkil etməsini başa düşmədiyini deyib.

Aktyor pula ehtiyacı olsa belə, bu yolla yardım istəməyəcəyini vurğulayıb:

"Həyatım çox sadədir, belə xarici mənbələrə müraciət etməzdim”.

Baş verənləri "utancverici" adlandıran aktyor pərəstişkarlarından pul göndərməmələrini xahiş edib. Həyatındakı hər şeyə görə minnətdar olduğunu deyən Rurk bu cür yardım çağırışının onun üslubuna uyğun olmadığını bildirib.

Qeyd edək ki, 73 yaşlı aktyorun paylaşdığı videoya sosial şəbəkələrdə çoxsaylı dəstək mesajları gəlib.

Xatırladaq ki, Mikki Rurk illər əvvəl baş rolunu oynadığı “Wrestler” filmindəki performansına görə Oskar mükafatına namizəd göstərilib və “Ən yaxşı aktyor” nominasiyasında Qızıl Qlobus və BAFTA mükafatlarını qazanıb.

• Həbsxanada qatillərlə eyni kamerada saxlanılan rəssam - "Mazas albomu" necə yarandı?
• "Yuva" filmi yenidən nümayiş olunacaq
• “Səssiz dualar - Zirə Cümə məscidində qorunan mədəni irs” sərgisi açıldı