Müasir tarixin ən cəsarətli soyğunlarından birində ittiham olunan iki şübhəli şəxs istintaqa verdikləri ifadə ilə hər kəsi heyrətləndirib.

Kulis.az xəbər verir ki, təqsirləndirilən şəxslər 88 milyon avro dəyərindəki tarixi zinət əşyaları soyğununa hadisədən cəmi 2-3 gün əvvəl cəlb olunduqlarını və onlardan birinin hədəfin dünyanın ən çox ziyarət edilən muzeyi – Luvr olduğunu belə bilmədiyini iddia edib.

"Le Monde" nəşrinin iyun ayında keçirilən dindirmə protokollarına əsaslanan xəbərinə görə, Abdullay N. və Qelamallah A. adlı şübhəlilər 19 oktyabr 2025-ci ildə Luvr muzeyinin Apollon qalereyasından səkkiz ədəd tarixi Fransa tacı cəvahiratının oğurlanması ilə nəticələnən əməliyyat barədə bu günə qədərki ən təfərrüatlı ifadələrini veriblər.

15-25 min avro qarşılığında tarixi cinayət

İttiham olunan şəxslərin sözlərinə görə, kimliyi gizli saxlanılan bir təşkilatçı tərəfindən soyğundan cəmi bir neçə gün əvvəl tapşırıq alıblar. Bu işin müqabilində isə onlara 15-25 min avro arasında pul vəd edilib.

Soyğundan əvvəl onlara qalereyanın təhlükəsizlik kameralarının videoları izlədilib və vitrinləri sındıraraq mümkün qədər çox cəvahirat götürmələri tapşırılıb. Abdullay N. ifadəsində hədəfin Luvr olduğunu bildiyini etiraf etsə də, Qelamallah A. oranı sadəcə "Parisdəki sıradan bir zərgərlik dükanı" zənn etdiyini irəli sürüb.

"Hər yer qaranlıq idi, yalnız vitrinlərin işıqları yanırdı..."

İstintaq sənədlərinə əsasən, 19 oktyabr 2025-ci il səhər saat 09:30 radələrində şübhəlilər təmir işləri bəhanəsi ilə səbətli bir kranla Luvrun Apollon qalereyasına daxil olublar. Daha sonra elektrik kəsici alətlərdən istifadə edərək vitrinləri açıblar.

Abdullay N. hadisə anını bu cür təsvir edib:

"İçəri girəndə ətrafda heç kim yox idi. Hər yer qaranlıq idi, yalnız vitrinlərin işıqları yanırdı. Uzaqdan mühafizəçilərin bir qapının arxasında və ya başqa bir nöqtədə hərəkət etdiyini görə bilirdim".

8 dəqiqəlik qaçış və yerə düşən tarixi tac

Cəmi 8 dəqiqə ərzində onlar Fransa kraliçaları və imperatriçalarina məxsus tac, boyunbağı, sırğa və broşların da olduğu 88 milyon avroluq cəvahiratı götürərək motosikletlə hadisə yerindən qaçıblar. Lakin qaçış zamanı İmperatriçə Yevgeniyaya məxsus tarixi tac yerə düşüb və sonradan muzeyin yaxınlığında tapılıb.

Oğurlanan əşyalar qısa müddət sonra təşkilatçıya təhvil verilsə də, o, əldə edilən qənimətdən narazı qalıb. Abdullay N. bu barədə deyib:

"O düşünürdü ki, biz daha çox zinət əşyası gətirə bilərdik".

Hər iki təqsirləndirilən şəxs təşkilatçının kimliyini açıqlamaqdan imtina edib və bunun səbəbini qisas qorxusu ilə əlaqələndiriblər. Qelamallah A. ona edilən təhdidləri belə izah edib:

"Onlar elə də məsum insanlar deyillər. Mənə birbaşa təhdid edilməsə də, həbsdə olarkən kənardan zənglər gəldi. Mənə sadəcə susmağım tapşırıldı".

• Nolan sevimli filmlərini açıqladı
• "Ayaqlarımız kəsik-kəsik olmuşdu" - Deymon "Odisseya" haqqında danışdı
• Rus ordusunun ilk və yeganə müsəlman general-adyutantı - Kəngərlilər nəslindən olan Hüseyn xan Naxçıvanski kim idi?