Uilyam Şekspirin düz 417 il əvvəl öz bağında əkdiyi tut ağacından hazırlanan antik masa İngiltərədə birmərtəbəli kiçik bir evdən (bunqalovdan) tapılıb.

Kulis.az xəbər verir ki, əsrlərdir nəsildən-nəslə ötürülən bu unikal mebel əşyası tezliklə hərraca çıxarılacaq.

Tarixi mənbələrə görə, bu masa 18-ci əsrdə sözügedən ağacın kəsilməsindən sonra qalan oduncaqlardan hazırlanıb. Həmin vaxt ağacın olduğu ərazinin sahibi – bir rahib, turistlərin fasiləsiz ziyarətlərindən və ağacı görmək istəklərindən bezdiyi üçün onu kəsdirmişdi.

52 illik ömrün rəmzi

Masanın üst hissəsi Şekspirin ağacının budağından eninə kəsilmiş 52 ədəd nazik, oval formalı tut ağacı dilimindən hazırlanıb. Deyilənə görə, bu 52 parça dahi dramaturqun yaşadığı 52 ili simvolizə edir. Əsasən palıd ağacından olan və 135 santimetr diametrə malik bu mərkəz masası 1830-cu ildə düzəldilmiş iki masadan biridir. O, vaxtilə Metyu Mills tərəfindən lotereyada udulub.

Sonradan mebel onun Stratford-apon-Eyvondakı malikanəsinin (Billesley Hall) dəhlizində dayanıb və ardınca kürəkəni keşiş Tomas Higginsə miras qalıb. Hazırda isə stolun sahibi həmin keşişin Qərbi Sasseks ştatının Horşam şəhərində yaşayan 90 yaşlı nəticəsidir. Yaşlı qadın illərlə bu tarixi əşyadan evində sadəcə yemək masası kimi istifadə edib.

8 min funt-sterlinqə satışa çıxarılır

Ailə həmişə bu masanın dəyərli olduğundan şübhələnib və indi evlərinin təmirə ehtiyacı olduğu üçün onu satmaq qərarına gəlib. Masa noyabrın 5-də Qərbi Sasseksdəki "Toovey's" hərrac evində 8 min funt-sterlinq (təqribən 10 min 400 dollar) ilkin qiymətlə satışa çıxarılacaq.

Hərrac evinin nümayəndəsi Uill Rouzellin sözlərinə görə, bu əşyanın tarixi Britaniyada yerli ipək sənayesini inkişaf etdirmək üçün tut ağaclarının əkilməsini təşviq edən Kral I Ceymsin dövrünə gedib çıxır:

"Məhz bu təşəbbüs sayəsində Uilyam Şekspir 1609-cu ildə Stratford-apon-Eyvondakı 'New Place' adlı evinin bağında bu ağacı əkmişdi".

Ağac 1756-cı ildə "New Place"in o vaxtkı sahibi keşiş Frensis Qastrell tərəfindən kəsilib. Bu addım o qədər böyük qəzəb doğurub ki, rahib qısa müddət sonra şəhəri tərk etməli olub. Yerli dülgər Tomas Şarp isə kəsilmiş ağacın böyük hissəsini alaraq Şekspirə həsr olunmuş xatirə əşyaları düzəldib. Kəsilən ağacdan hissələr alanlar arasında sənətkar və ağacoyma ustası kimi tanınan Con Marşall və məşhur Şekspir aktyoru Devid Qarrik də var idi.

Ekspert Rouzell qeyd edib ki, təxminən 200 illik masanı yaşlı qadının evində yemək otağının küncündə, süfrənin altında aşkar edib: "Ev sahibəsi qadının evinin bir az təmirə ehtiyacı var və o, artıq bu masaya ehtiyac duymadığını anladı. Bu, həqiqətən də qeyri-adi gözəlliyə malik bir tarixi əşyadır".

Şekspirin tut ağacı və 18-ci əsrin "relikviya" ənənəsi

18-ci əsrin ortalarında İngiltərədə Uilyam Şekspirə olan maraq bir növ kulta çevrilmişdi. Xüsusilə 1769-cu ildə məşhur aktyor Devid Qarrikin təşkil etdiyi Şekspir yubileyindən sonra dramaturqa aid hər hansı bir əşya, hətta onun həyətindəki ağacın qırıntıları belə müqəddəs relikviya kimi qəbul edilirdi. Keşiş Qastrellin tut ağacını turistlərin səs-küyündən bezib kəsdirməsi əslində ingilis ədəbiyyatsevərləri tərəfindən misilsiz vandalizm aktı kimi qiymətləndirilmişdi. Kəsilən ağacın oduncağından hazırlanan xatirə əşyaları, o cümlədən masalar, qutular və stəkan altlıqları o dövrün zənginləri arasında ən dəyərli kolleksiya nümunələrinə çevrilmişdi. Şekspirin tut ağacından hazırlanan bu masa 52 parça (52 illik ömür) simvolizmi ilə təkcə mebel deyil, həm də ədəbiyyat tarixinin toxunula bilən bir parçasıdır.

Ülvi Bahadır

• Tanınmış sənətçilərin 10 illik evliliyi sonlanır - Səbəb
• Mədəniyyət Nazirliyinin tabeliyindəki qurumların siyahısı dəyişdi
• İnsan torpağı itirəndə, əslində, nəyi itirir? - "Torpağın ruhu" haqqında