Azərbaycanın tarixi-mədəni irsini beynəlxalq oxucu auditoriyasına tanıdan "IRS-Heritage" jurnalının ingilis dilində 2026-cı ilin ilk nömrəsi nəşr olunub.

Kulis.az xəbər verir ki, jurnalın yeni buraxılışında Azərbaycanın qədim tarixi, memarlıq irsi, musiqi mədəniyyəti, etnoqrafiyası, müasir şəhərsalma təcrübəsi və turizm potensialını əks etdirən maraqlı araşdırmalar yer alıb.

Nəşrin baş redaktoru Musa Mərcanlının giriş məqaləsində diqqət bu il 100 illiyi qeyd olunan Birinci Türkologiya Qurultayına yönəldilir. Müəllif Bakıda keçirilən bu mötəbər elmi toplantının Türk dünyasının mədəni və elmi inteqrasiyası baxımından tarixi əhəmiyyətini vurğulayır, onun ideyalarının bu gün də aktuallığını qoruduğunu qeyd edir.

Jurnalın "Keçmişdən gələn" rubrikasında akademik Nizami Cəfərovun Birinci Türkologiya Qurultayının tarixi missiyasına həsr olunmuş məqaləsi dərc edilib.

"Şəxsiyyət" rubrikasında akademik Cəfər Qiyasi XII əsr Azərbaycan memarlıq məktəbinin dahi nümayəndəsi Əcəmi Naxçıvaninin zəngin yaradıcılığından bəhs edir.

Nəşrdə ilk dəfə təqdim olunan "Urban Studies" rubrikasında tarix üzrə fəlsəfə doktoru Səbuhi Əhmədov Bakının "Qara şəhər"dən "Ağ şəhər"ə çevrilməsi timsalında Azərbaycanın insan mərkəzli və dayanıqlı şəhərsalma modelini təhlil edir. Məqalədə ekoloji transformasiya, müasir urbanistika prinsipləri və Bakıda 2026-cı ildə keçirilmiş Dünya Şəhərsalma Forumu kontekstində ölkəmizin əldə etdiyi nailiyyətlərdən bəhs olunur.

Jurnalın bu nömrəsində, həmçinin Almaniyadan olan müəllif Daqmar Kuhnun "Şərqlə Qərb arasında – Azərbaycan musiqisi ilə tanışlığım" adlı məqaləsi təqdim edilir.

Yeni nömrədə bununla yanaşı, Azərbaycanın etnoqrafiyası, təsviri incəsənəti, çay mədəniyyəti və qonaqpərvərlik ənənələri, eləcə də Xınalığa aparan turizm marşrutu haqqında materiallar da yer alıb.

Müxtəlif dillərdə nəşr olunan "IRS-Heritage" jurnalı Azərbaycanın tarixi, mədəniyyəti və zəngin irsinin beynəlxalq aləmdə tanıdılması istiqamətində mühüm nəşrlərdən biri kimi fəaliyyətini davam etdirir.

• Mühasirədən qalan çörək, Afrika maskaları, tarakanlar... - Dahilərin qəribə kolleksiyaları
• Qız məktəbi açmaq üçün imperatora ağız açan mesenat - Ömər Faiq Nemanzadə onun haqqında nə yazırdı?
• Tarixçi alim: "Möminə Xatun türbəsinin bərpası olduqca əhəmiyyətlidir"