"Aishe" səhnə adı ilə tanınan gənc türk reper Tuğçe Ayşe Güler vəfat edib.

Kulis.az xəbər verir ki, xəbəri sənətçinin sosial media hesabı vasitəsilə qardaşı yayıb.

O, paylaşımında, "Mən qardaşıyam, bacım vəfat etdi. Başımız sağ olsun", - deyə qeyd edib.

Reperin ölüm səbəbi hələlik tam rəsmi təsdiqini tapmasa da, qardaşı tərəfindən verilən açıqlamada onun tibbi səhlənkarlıq ucbatından həyatını itirdiyi iddia edilib. Açıqlamada ifaçının xəstəlik prosesi və xəstəxanada yaşananlarla bağlı kəskin ittihamlar yer alıb.

Qardaşı baş verənləri bu cür izah edib:

"Bacım qulaq infeksiyası keçirdi, ardınca üz iflici oldu. Əməliyyat olundu, vəziyyəti yaxşı idi və xəstəxanadan evə buraxıldı. Ancaq bu proses zamanı tətbiq edilən kortizon müalicəsi vaskulitə (qan damarlarının iltihabı) səbəb oldu. Yenidən əməliyyata alındı və təəssüf ki, ürəyi dayandı. Kortizonu qəfildən kəsdirdikləri üçün vaskülit yarandı. Təcili yardıma getdik, ancaq "əlavə təsirdir" deyərək bizi geri qaytardılar. Yenidən halı pisləşəndə xəstəxanaya yatırdılar, lakin düz 4 gün ərzində diaqnoz qoya bilmədilər, bacım heç bir müalicə almadı. Palatada vəziyyəti daha da pisləşdiyi üçün reanimasiyaya köçürüldü".

Müalicə prosesində həkimlərin gecikdiyini iddia edən qardaşı xəstəxanadakı etinasızlıqdan şikayətlənib:

"Lap əvvəldən "xəstəliyi ola bilər" deməyimə baxmayaraq, bir həftə boyunca heç nə edilmədi və bizi yubatdılar. Revmatologiya şöbəsi ölümündən sadəcə 1 gün əvvəl diaqnoz qoya bildi, lakin artıq çox gec idi. Bacım göz görə-görə səhlənkarlıq səbəbindən vəfat etdi".

• Diddinin azadlığa çıxacağı gün yenidən dəyişdi
• "Maykl" filmindən rekord
• Motsartın heç kimə məlum olmayan gizli əlyazmaları tapıldı