Görkəmli yazıçı Çingiz Aytmatovun 95 illik yubileyi Qırğız Respublikasının Nazirlər Kabinetinin Sərəncamı əsasında Mədəniyyət, İnformasiya, İdman və Gənclər Siyasəti Nazirliyi tərəfindən təşkil olunub.

Kulis.az xəbər verir ki, Bişkekdə keçirilən tədbirdə Azərbaycan Yazıçılar Birliyinin Gənclər şurasının sədri, gənc şair Fərid Hüseyn də iştirak edib. Tədbirdə F.Hüseyn Azərbaycan Yazıçılar Birliyinin sədri, Xalq yazıçısı Anarın Çingiz Aytmatov Formuna ünvanlandığı məktubu oxuyaraq birlik sədrinin təbrikini çatdırıb.

Tədbirin Müzakirə panellərindən birində Fərid Hüseyn “Hər yeni əsrlə bərabər yeni mahiyyət qazanan Çingiz Aytmatov ideyaları” adlı məruzə ilə çıxış edərək, yazıçının dünya ədəbiyyatında köhnəlməz olan, XXI əsrin çağırışları ilə səsləşən ədəbi düşüncələrindən söz açıb.
Qeyd edək ki, beynəlxalq tədbirə Qazaxıstan, Türkiyə, Özbəkistan, Türkmənistan, Rusiya, Belarus, Gürcüstandan elm, sənət və mədəniyyət adamlarından ibarət nümayəndə heyətləri qatılıblar.

Silsilə tədbirlər zamanı yazıçının məzarına, ev muzeyinə ziyarətlər təşkil edilib, həmçinin ədibin əsərləri əsasında “Qırmızı alma” filmi və “Ana tarla” tamaşası nümayiş etdirilib, Tarix Muzeyində görkəmli ədibə aid daimi ekspozisiyanın açılış mərasimi baş tutub. Bundan başqa, silsilə tədbirlər çərçivəsində Qırğız Milli Akademik Teatrında “Aytmatov və teatr” adlı festivalın bağlanış və mükafatlandırılma mərasimi baş tutub.

Beynəlxalq Forumun yekununda “Aytmatov və Avrasiyaçılıq”, “Biz dünyanı dəyişirik, dünya da bizi”, “Biz eyni gəmidəyik” adlı Beynəlxalq Forumun yekununa aid qətnamələrin hazırlanması və müzakirəsi nəzərdə tutulub.

• "Həm kədərli, həm gülməli" üslubun müəllifi - Onun hansı filmi qalmaqala səbəb olmuşdu?
• "Tarix həmişə qaliblər tərəfindən yazılır..." - Den Braundan aforizmlər
• İnsan emosiyalarını kətana köçürən ustad rəssam