Norveç millisini tarixində ilk dəfə Dünya Çempionatının dörddəbir finalına daşıyan və turnirin ən dəyərli futbolçularından biri olan Erlinq Holandın köhnə videoları yenidən qlobal gündəmi zəbt edib.

Kulis.az xəbər verir ki, Lionel Messi və Kilian Mbappe ilə birlikdə çempionatın ən məhsuldar hücumçularından olan ulduz futbolçu həm də rəğbət doğuran zarafatları və əyləncəli sosial media paylaşımları ilə yadda qalmağı bacarıb.

Hazırda dünya futbolunun ən qorxulu qol maşını hesab olunan hücumçunun təxminən on il əvvəl dostları ilə birlikdə bəstələdiyi rep parçası yenidən internetdə virus kimi yayılaraq rekord qırır.

15 yaşlı Holand və "Flow Kingz" qrupu

"Kygo jo" adlı mahnı 2016-cı ildə, Holandın 17 yaşadək gənclərdən ibarət milli komandadakı dostları Erik Botheim və Erik Tobias Sandberqlə birlikdə qurduğu "Flow Kingz" qrupu tərəfindən yazılıb.

Rep dünyasında "Lyng" ləqəbini istifadə edən 15 yaşlı Holand qrupun ev şəraitində çəkdiyi klipdə manqal başında rep deyir, trambolində tullanır və kiçik bir oyuncaq maşının üzərində poza verir. Hazırda bu həvəskar video "YouTube" platformasında 21 milyon baxış sayını keçib.

Norveç dilini bilməyənlər üçün mahnının giriş hissəsinin tərcüməsi olduqca gülməli və maraqlıdır:

"Son vaxtlar ortalıqda yoxsan, yoxsa itib-batmısan? / Mən mahnılar bəstələdim və bir milyard qazandım / Yerı gəlmişkən, özümə qazlı bir manqal da aldım / Maraqlıdırsa, marketə də getmişdim / Əlimdə xərcləməyə çoxlu pul olduğu üçün bir az alış-veriş etdim / Əlbəttə, səninlə də bölüşərəm, dostum / Çünki bilirəm ki, səndə elə də pul qalmayıb."

Mahnının davamında isə gənc ulduz düzgün qidalanmaqdan və lüks səyahətdən bəhs edir:

"Keçən gün çöldə Sezar salatı yeyirdim / Mənim kimi iri bir adamın düzgün qidalanması lazımdır / Sonra alış-veriş üçün Baham adalarına getdim / Amma həyat yoldaşıma demədim, ona görə mənə bir az əsəbiləşdi / Amma mən çox əyləndim, heç bir sərhəd yox idi / İndi ora yenidən getmək istərdim / Amma gündüzlər ofisdə görüləsi çox işim var / Ona görə gəl çıxaq, qarnımızı doyuraq".

"İngiltərəni məğlub etsək, stadionda bu mahnı çalınmalıdır!"

Holandın bu sevimli və səmimi keçmişi azarkeşlər tərəfindən böyük coşqu ilə qarşılanıb. Norveçli futbolsevərlər sosial şəbəkələrdə xüsusi kampaniyaya başlayaraq maraqlı bir təklif irəli sürüblər.

Azarkeşlər bildirir ki, əgər Norveç növbəti mərhələdə İngiltərəni məğlub etməyi bacarsa, komandanın qələbə rəqsi üçün stadionda mütləq Holandın bu repi səsləndirilməlidir.

• "Polis müharibələri"nin aktyoru vəfat etdi
• “Birgə film istehsalına dəstək müsabiqəsi” elan edildi
• Qaçılmaz sonun kətan üzərində təsviri - Leypoldun "Məzarlığın girişi" tablosu