İnvestisiya fəaliyyəti ilə məşğul olan platformada valyuta alqı-satqısı həyata keçirməklə gəlir əldə etmək istəyən üç nəfərin külli miqdarda pulunu ələ keçirməkdə təqsirləndirilən Nizami Alışanın cinayət işi üzrə məhkəmə prosesi keçirilib.
Kulis.az APA-ya istinadən xəbər verir ki, bu gün Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən prosesdə şahid qismində Nizami Alışanın həyat yoldaşı Günel Elariz qızı Alışan ifadə verib. Şahid bildirib ki, onun yoldaşı ilə əlaqəsi aprelin 9-da kəsilib: "Nizami aprelin 9-u mənə dedi ki, işdədir. Oradan çıxıb Babək Məmmədovla görüşməyə gedəcək. Mən də uşaqları bağçadan götürməyə getdim. Aprelin 11-də mənə onun öz nömrəsindən zəng gəldi. Nizami dedi ki, Kibercinayətkarlıqla Mübarizə Baş İdarəsindədir”.
Digər şahid Rövşən Tağı oğlu Dadaşov hazırda 2 saylı cəzaçəkmə müəssisəsində cəza çəkdiyini deyib. Bildirib ki, ötən aylarda Cinayət Məcəlləsinin 178.3-cü maddəsi ilə cinayət məsuliyyətinə cəlb olunub: "Çalışdığım dövrlərdə Nizami Alışan bizə treninqlə bağlı müraciət edib. Ona bu sahəni mən öyrətmişəm. Daha sonra Nizami özü bu sahə ilə sərbəst şəkildə məşğul olub. O, İnvest.az-ın maliyyə şöbəsi ilə əməkdaşlıq edib, mədaxil-məxariclər ediblər. Mən mühasibatlıqda çalışmıram deyə dəqiq məlumat verə bilmirəm. Digər proseslərdən xəbərim olmayıb".
Vəkil Samir İsayev vəsatət verərək İnvest.az-ın direktoru Elşən Quliyevin dindirilməsini xahiş edib. Bundan əlavə, Babək Məmmədzadənin aprelin 9-nu əhatə edən anten məlumatlarının məhkəməyə təqdim olunmasını xahiş edib.
Hər iki vəsatət təmin edilib.
Proses iyulun 7-nə təxirə salınıb.
Qeyd edək ki, iş üzrə zərərçəkən qismində 3 nəfər - Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilov tanınıb.
İttihama görə, təqsirləndirilən Nizami Alışan özünü səhm və valyuta alqı-satqısı ilə məşğul olan mütəxəssis kimi təqdim edib. O, Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu ələ keçirib.
Zərərçəkmişlərə dəyən ümumi ziyan 2 milyon 445 min dollar (4 milyon 156 min 500 AZN) təşkil edir.
Ona Cinayət Məcəlləsinin 178.4-cü (dələduzluq - xüsusilə külli miqdarda ziyan vurmaqla törədildikdə) maddəsi ilə də ittiham irəli sürülüb.
Nizami Alışan AzTV-nin keçmiş sədri Arif Alışanovun qardaşı oğlu, hazırda ABŞ-da yaşayan müğənni Elariz Məmmədoğlunun kürəkənidir.
Babək Məmmədzadə “Aztelecom” MMC-nin sabiq direktoru Məhəmməd Məmmədovun oğludur.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
