Beynəlxalq Muğam Mərkəzində Cahangir Cahangirov adına Xor Xalq şairi Bəxtiyar Vahabzadənin 100 illiyinə həsr olunan "Səninlə dünyada bəxtiyaram mən" adlı ədəbi-musiqili proqram təqdim edib.

Kulis.az xəbər verir ki, Xalq artisti Mehriban Zəkinin aparıcılıq etdiyi tədbir ədəbiyyat və musiqinin həmahəngliyi ilə tamaşaçılarda xoş ovqat yaradıb.

Konsertdə Cahangir Cahangirov adına Xorun bədii rəhbəri, Əməkdar müəllim Təranə Yusifovanın rəhbərliyi ilə kollektiv müxtəlif musiqi janrlarını – muğam, estrada, klassik bəstəkar yaradıcılığı və caz elementlərini özündə birləşdirən geniş repertuar təqdim edib.

Konsertdə şairin sözlərinə bəstələnmiş dillər əzbəri olan mahnılar səsləndirilib. Gecə boyu Azərbaycan Milli Konservatoriyası nəzdində İncəsənət Gimnaziyasının Xoreoqrafiya şöbəsinin yuxarı sinif şagirdlərindən ibarət rəqs kollektivinin çıxışı tədbirə xüsusi rəng qatıb.

Xalq artisti Mehriban Zəkinin ifasında şairin poeziyasından nümunələr gecənin bədii xəttini daha da zənginləşdirib. Teatrallaşmış şəkildə təqdim olunan musiqi nömrələri, şairin məşhur şeirləri ilə vəhdət təşkil edərək tamaşaçılara Bəxtiyar Vahabzadənin Azərbaycan ədəbiyyatı tarixində xüsusi mövqeyə malik olduğunu bir daha nümayiş etdirib.

Konsert boyunca xorun və solistlərin ifasında "Biri sənsən, biri mən", "Dodaqda gəz", "Gecələr bulaq başı", "Sən güldən də gözəlsən", "Sənin vüqarın mənəm", "Bir millət, iki dövlət", "Ana torpaq" kimi əsərlər də səsləndirilib. İfaçıları Əməkdar artist Nərgiz Əliyeva (piano), Səxavət Məmmədov (tar), Yusuf Rüstəmov (nağara), Röyal Heydərli (saz), Hüseyn Ələkbərli (balaban) və Mahir Quliyev (kamança) müşayiət edib.

Xalq şairi, tanınmış dramaturq, ədəbiyyatşünas və ictimai xadim, Dövlət mükafatları laureatı Bəxtiyar Vahabzadənin 100 illiyinə həsr edilən ədəbi- musiqili gecə şairin Azərbaycan ədəbiyyatının xüsusi mövqeyə malik görkəmli simalarından olduğunu, poeziyasının insanı daim mənəvi ucalığa səslədiyini, poetik-fəlsəfi məzmunlu yaradıcılığı milli poeziyada vətəndaşlıq ruhunun qüvvətlənməsində böyük rol oynadığını musiqi və şeirin dili ilə nümayiş etdirib.

• Rəşid Behbudov ona niyə kömək etmədi? - Cəfər Behbudovun son sözləri
• Məşhur aktyor vəfat etdi
• Şəmkirdəki Alman Lüteran kilsəsində III Beynəlxalq Opera Festivalı keçirildi