Azərbaycanın Özbəkistandakı səfirliyinin nəzdində Heydər Əliyev adına Azərbaycan Mədəniyyət Mərkəzində Özbəkistanın aparıcı media mənsubları ilə görüş keçirilib. Tədbirdə qəzet, informasiya agentlikləri, xəbər portalları, televiziya və radio qurumlarını təmsil edən jurnalistlər iştirak ediblər.

Kulis.az xəbər verir ki, görüşdə mərkəzin direktoru Akif Marifli Azərbaycan ilə Özbəkistan arasında strateji tərəfdaşlıq münasibətlərinin media sahəsində əməkdaşlıq üçün möhkəm zəmin yaratdığını söyləyib. Vurğulayıb ki, Azərbaycan Prezidenti İlham Əliyev və Özbəkistan Prezidenti Şavkat Mirziyoyevin həyata keçirdiyi siyasət nəticəsində hər iki ölkədə medianın inkişafına və jurnalistlərin peşəkarlıq səviyyəsinin artırılmasına xüsusi diqqət yetirilir.

Akif Marifli qeyd edib ki, mərkəzin təşəbbüsü ilə artıq uzun illərdir Özbəkistanın aparıcı media qurumlarının nümayəndələri üçün Azərbaycana mediaturlar təşkil olunur. Bu səfərlər çərçivəsində Azərbaycanla bağlı mövzuların obyektiv və geniş şəkildə işıqlandırılması, habelə iki xalq arasında dostluq və tərəfdaşlıq münasibətlərinin, mədəniyyətin və xalq diplomatiyasının təbliğində fəal iştirak edən jurnalistlər hər il Azərbaycan Mədəniyyət Mərkəzi tərəfindən müvafiq qaydada mükafatlandırılırlar.

Onun sözlərinə görə, mərkəz informasiya sahəsində əməkdaşlığın davamlı, sistemli və institusional əsasda inkişaf etdirilməsinə xüsusi önəm verir.

Özbəkistan Jurnalistlər İttifaqının sədri Xolmurod Salimov çıxışında iki ölkə arasında media əlaqələrinin inkişafının əhəmiyyətini vurğulayıb. O bildirib ki, peşəkar əməkdaşlığın genişləndirilməsi və qarşılıqlı təcrübə mübadiləsi obyektiv informasiya mühitinin formalaşmasına, eləcə də qarşılıqlı etimadın möhkəmlənməsinə töhfə verir.

Sədr qeyd edib ki, Azərbaycan mövzusunun Özbəkistan mediasında daha fəal işıqlandırılması xalqlar arasında dostluq münasibətlərinin möhkəmlənməsinə xidmət edir və informasiya əməkdaşlığının davamlı xarakter almasına şərait yaradır.

Görüşdə Azərbaycan mövzusunun Özbəkistan mediasında daha geniş işıqlandırılması, birgə layihələrin hazırlanması və jurnalistlər arasında təcrübə mübadiləsinin davam etdirilməsi ilə bağlı məsələlər ətrafında fikir mübadiləsi aparılıb.

• Elza Seyidcahanın Rəşid Mahmudova qarşı iddiası üzrə qərar verildi
• "Yalnız axmaqlar qəti və arxayın olurlar..." - Mişel de Montenin sitatları
• Özbəkistan mədəniyyəti Qətərdə nümayiş olunur