Üzün ağdır, Oqtay!  - Tanınmış şair cəbhədəki xalası oğluna şeir yazdı  

Üzün ağdır, Oqtay!  - Tanınmış şair cəbhədəki xalası oğluna şeir yazdı  
2 noyabr 2020
# 14:44

Kulis.az tanınmış şair Sevinc Elsevərin cəbhədə olan xalası oğlu Oqtaya yazdığı şeiri təqdim edir.

On yaş böyüyəm cəbhədəki xalam uşağından
qucağımda oynatmışam
yanağını dartmışam
tut ağacının əli çatmayan budağını
çəkib ona sarı uzatmışam
mənə görə boyu sevələnəsi baladı hələ...
toyunu görməmişik
toyunda kəsmək üçün
xalamın böyütdüyü cöngə də qartıyıb!

İndi onunla bağlı nə xatirəm varsa
hamısını xatırlayıram
qızmar bir avqustda şəhərdən kəndə
qonaq getmişdim
qolları, qıçları
üzü-boynu qapqara oğlandı onda
günün altında çapan oğlan uşağıydı
“nə yaman qaralmısan
ona görə ki, Qaralar kəndində yaşayırsan?”
kəndlərinin adına da sataşmışdım...
“sən də kənddə yaşasan
bu qədər ağbəniz olmazsan”-demişdi
anasına tarlada, həyətdə- bacada kömək edərdi
səhərdən-axşamacan
əl boyda uşaq olandan

Qəlbinə dəymişdi zarafatım
peşman olmuşdum ordaca, həmən
qəribədir, necə unutmamışam mən?

İndi cəbhədə
onu qaraldan kəndi
məni ağardan şəhəri qoruyur
görəsən necədi rəngi-ruhu
küləyin altda
günəşin altda
güllə yağışı altda?

Üzün ağdır, Oqtay
dünyanın bütün şəhərlərində yaşayan
ağbəniz adamların hamısının üzündən ağ
bəxtin də ağ olsun, əziz qardaşım!
salamat qayıt,
qələbənə ən çox anan sevinəcək
sənin qələbən həm də evə sağ-salamat qayıdışındır!

# 2397 dəfə oxunub

Oxşar xəbərlər

3 yaşlı qardaşını 6 yaşlı qardaşına tapşırdı - KimsəBizlər

3 yaşlı qardaşını 6 yaşlı qardaşına tapşırdı - KimsəBizlər

16:28 26 aprel 2025
Əli Mirəliyev reanimasiyaya yerləşdirildi

Əli Mirəliyev reanimasiyaya yerləşdirildi

14:34 26 aprel 2025
Napoleonun şəxsi qılıncı hərraca çıxarıldı - FOTO

Napoleonun şəxsi qılıncı hərraca çıxarıldı - FOTO

13:00 26 aprel 2025
Britaniya şahzadəsini zorlamada ittiham edən qadın özünü öldürdü

Britaniya şahzadəsini zorlamada ittiham edən qadın özünü öldürdü

11:41 26 aprel 2025
Azərbaycanlıları öldürən m*rc oyunları – Bu “killeri” kimlər göndərib?

Azərbaycanlıları öldürən m*rc oyunları – Bu “killeri” kimlər göndərib?

11:00 26 aprel 2025
Azərbaycan milli mətbuatının 150 illik yubileyi keçiriləcək - Sərəncam

Azərbaycan milli mətbuatının 150 illik yubileyi keçiriləcək - Sərəncam

17:49 25 aprel 2025
# # #