Topçu Vüsalın atası: “Sinif yoldaşı şəhid olmuşdu, ona görə çox qəzəbliydi”

Media

Ana səhifə
Media

Topçu Vüsalın atası: “Sinif yoldaşı şəhid olmuşdu, ona görə çox qəzəbliydi” – Müsahibə

4 noyabr 2020

17:16

Kulis.az-a şəkli sosial şəbəkələrdə trendə çevrilən əsgər Vüsal Şahkərəmovun atası İslam Şahkərəmovla müsahibəsini təqdim edir. Xatırladaq ki, Vüsal Xaçmaz rayonunun Qusarçay kəndində anadan olub. Orta təhsilini eyni kənddə şəhid Arif Məmmədov adına orta məktəbdə alıb.

- İslam bəy, Vüsalın sosial şəbəkədə fotosunun yayılmasından xəbəriniz var yəqin

- Xəbərim var. Şəkili ilk dəfə mənə dostum göstərdi. Sonra televiziyada, sosial şəbəkələrdə gördüm. Qürur duydum oğlumla.

- Bir az Vüsaldan danışın. Necə uşaq idi, onu digər uşaqlardan fərqləndirən nə idi, necə böyüyüb?

- Vüsalın digər uşaqlardan fərqini hiss etməmişəm. Evin tək oğludur. 2001-ci ildə dünyaya gəlib. Böyük övladımdır. Vüsaldan başqa iki qız övladım var. Bildiyiniz kənd həyatında böyüyüb Vüsal. Özüm adi işçiyəm. Yəni iş olanda işləmişəm, olmayanda evlə, həyətlə məşğul olmuşam.

- Orta məktəbdə necə oxuyub?

- Yaxşı oxuyub. Ali məktəbə imtahan verdi, qəbul oldu, ancaq ödənişliyə düşdüyü üçün oxuya bilmədi. İmkanım çatmadı onu oxutdurmağa. Keçən il yayda hərbi xidmətə yola düşdü. İnşallah qismət olsa, yanvarda qayıtmalıdır.

- İslam bəy, Vüsalın yayılan fotosu həm də qəhrəmanlığın simvoluna çevrilib. Ondakı bu vətənpərvərliyi nə zamansa hiss etmişdiniz?

- Vüsalın çox yaxın dostu, həm də sinif yoldaşı şəhid olmuşdu. Ondan sonra Vüsal çox qəzəblənmişdi. Elə hey deyirdi, gedib o şərəfsizləri məhv eləmək lazımdır. İndi oğlum istəyinə çatıb. O, bir Azərbaycan əsgəridir. Mən də ata kimi oğlumla fəxr edirəm.

- Sevdiyi var?

- Yox. Mən bilən yoxdur.

- Axırıncı dəfə nə vaxt danışmısınız Vüsalla?

- Elə bu gün danışmışam.

- Əhval ruhiyyəsi necədir?

- Çox yaxşıdır əhval-ruhiyyəsi. Deyir, qələbə xəbəri ilə qayıdacam.