Bu gün Bakı şəhərində keçirilmiş Birinci Türkoloji Qurultayın 100-ci ildönümü tamam olur.

Prezident İlham Əliyevin müvafiq Sərəncamından irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında “Birinci Türkoloji Qurultay - 100” adlı elektron məlumat bazası hazırlanıb.

Kulis.az xəbər verir ki, bazada bir sıra rəsmi sənədlərin, həmçinin akademik Nizami Cəfərovun, filologiya elmləri doktoru, professor Mahirə Hüseynovanın və filologiya üzrə elmlər doktoru Aysel Qəriblinin birgə hazırladıqları “Birinci Türkoloji Qurultayın tarixi missiyası”, akademik Nizami Cəfərovun “Birinci Türkoloji Qurultayın yüzüncü ildönümü ərəfəsində düşüncələr”, professor Nadir Məmmədlinin “Birinci Ümumittifaq Türkoloji Qurultayda əlifba məsələsi”, filologiya elmləri doktoru Elnarə Akimovanın “I Türkoloji Qurultay - türk ruhunun qələbəsi”, filologiya elmləri doktoru, professor Asif Rüstəmlinin “Cəfər Cabbarlının Birinci Türkoloji Qurultayda fəaliyyəti” adlı məqalələrin tam mətni təqdim edilir.

Kitabxana əməkdaşları tərəfindən hazırlanan bazada bir sıra görkəmli şəxslərin bu tarixi əhəmiyyətli, mühüm hadisənin mahiyyəti haqqında söylədikləri dəyərli fikirlər, bu mövzuda qələmə alınan kitab və dövrü mətbuat nümunələrinin siyahısı yer alır. Elektron məlumat bazasında “Türk xalqlarının tarixinin parlaq səhifəsi”, “Dissertasiya və avtoreferatlar”, “Virtual sərgi” , “Foto və videoqalereya” kimi bölmələr də mövcuddur.

“Birinci Türkoloji Qurultay - 100” adlı elektron məlumat bazası kitabxananın rəsmi saytında yerləşdirilib.

• Ədəbi görüşlər - Rüstəm Dastanoğlu
• Alek Bolduin yenidən məhkəmə qarşısında: "Pas" filmindəki faciənin izləri silinmir
• "Avropasayağı" tərbiyə metodu: Müəllimləri 200 manat cərimələmək bizə nə verəcək?