“Bəxtiyar” tamaşasının premyerası oldu

“Bəxtiyar” tamaşasının premyerası oldu
7 may 2022
# 11:20

Mayın 6-da Azərbaycan Dövlət Akademik Musiqili Teatrının 112-ci mövsümünün növbəti premyerası – “Bəxtiyar” musiqili komediyasının premyerası olub.

Kulis.az xəbər verir ki, görkəmli bəstəkar Tofiq Quliyevin musiqiləri əsasında ilk dəfə səhnəyə qoyulacaq tamaşa Akademik Musiqili Teatrın baş rejissoru Cavid İmamverdiyevin quruluşunda səhnələşdirilib. Tofiq Quliyevin 105 illiyinə həsr olunan səhnə əsəri füsunkar və əvəzolunmaz səsi ilə milyonların yaddaşlarda silinməz izlər qoyan SSRİ Xalq artisti Rəşid Behbudovun həyat və yaradıcılığını özündə əks etdirən “Bəxtiyar” filminin motivləri əsasında hazırlanıb.

Tamaşanın təqdimatından əvvəl Rejissor Cavid İmamverdiyev teatr kollektivinin bu tamaşanın premyerasına çox böyük məsuliyyətlə hazırlaşdığını bildirib: “1955-ci ildə Əməkdar incəsənət xadimi Lətif Səfərovun rejissorluğu ilə çəkilən "Bəxtiyar" filminə demək olar ki, hər kəs baxıb və əsərin süjet xətti ilə hamı tanışdır. Bu dəfə Akademik Musiqili Teatrın səhnəsində dahi bəstəkar Tofiq Quliyevin bənzərsiz musiqiləri tamaşaçıların könlümü oxşayacaq. Canlı orkestrin müşayiəti ilə peşəkar aktyorların ifası teatrsevərlərə nostalji hisslər yaşadaraq, fərqli təəssüratlar bəxş edəcək",- deyə C.İmamverdiyev bildirib.

Tamaşanın quruluşçu dirijoru Əməkdar incəsənət xadimi Fəxrəddin Atayev, quruluşçu rəssamı Elşən Sərxanoğlu, xormeysteri Əməkdar artist Vaqif Məstanov, dirijoru Səməd Süleymanlı, konsertmeysteri Fidan Babayeva, rəqslərin quruluşçusu Elvira Əzizova, rejissor assistenti Zaur Əliyevdir.

Bəxtiyar obrazını teatrın gənc və istedadlı solistləri Şaban Cəfərov, İbrahim Əlizadə, Emil Zeynallı, Saşa obrazını isə Aydan Həsənova, Mehriban Zaliyeva və Nəzrin İsmayılzadə canlandırıblar.

Anşlaqla keçən tamaşanın hər epizodu alqışlarla qarşılanıb. Premyerada görkəmli sənət adamları da iştirak ediblər.

Səhnə əsəri təkrar bu gün də teatrsevərlərin ixtiyarına veriləcək.

Tamaşa üçün biletləri şəhərin bütün teatr-konsert kassalarından və “ASAN Xidmət” mərkəzlərindən, eləcə də “İticket.az” saytından əldə etmək mümkündür.

# 2346 dəfə oxunub

Oxşar xəbərlər

Azərbaycan “Bir Ud - Çoxlu Mədəniyyət” Forumunda

Azərbaycan “Bir Ud - Çoxlu Mədəniyyət” Forumunda

13:30 28 aprel 2025
Möylə Mirzəliyev vəfat etdi

Möylə Mirzəliyev vəfat etdi

12:40 28 aprel 2025
Oskar mükafatlı aktyorun ölüm səbəbi məlum oldu

Oskar mükafatlı aktyorun ölüm səbəbi məlum oldu

12:38 28 aprel 2025
Məmməd Orucun "Köçürülmə"si - Təqdimat

Məmməd Orucun "Köçürülmə"si - Təqdimat

12:18 28 aprel 2025
Gənc musiqiçilərimiz Berlində

Gənc musiqiçilərimiz Berlində

12:10 28 aprel 2025
Barselonada 500 illik gəmi tapıldı

Barselonada 500 illik gəmi tapıldı

11:10 28 aprel 2025
#
#
# # #