Bursada “Azərbaycanın incisi Şuşa” adlı fotosərgi keçirilib.
Kulis.az xəbər verir ki, Bursada keçirilən Şuşa Günləri çərçivəsində dünyaca məşhur fotoqraf Reza Deqatinin Qarabağ mədəniyyətini əks etdirən “Azərbaycanın incisi Şuşa” fotosərgisi açılıb.
Sərgi 2022-ci il üçün “Türk dünyasının mədəniyyət paytaxtı” Bursada keçirilən Şuşa Günləri Beynəlxalq Türk Mədəniyyəti və İrsi Fondu ilə Bursa Böyükşəhər bələdiyyəsinin birgə təşkilatçılığı ilə baş tutub.
Beynəlxalq Türk Mədəniyyəti və İrsi Fondunun prezidenti Günay Əfəndiyeva, Azərbaycanın İstanbuldakı Baş konsulu Nərminə Mustafayeva, Türkiyə Respublikasının mədəniyyət və turizn nazirinin müavini Serdar Cam, Bursa Böyükşəhər bələdiyyəsinin sədri Alinur Aktaş, Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov, Beynəlxalq Türk Mədəniyyəti Təşkilatının (TÜRKSOY) Baş katibi Sultan Rayev, Bursa valisi Yakup Canbolat və digərləri sərgidə iştirak ediblər.
Sonra Beynəlxalq Türk Mədəniyyəti və İrsi Fondunun prezidenti Günay Əfəndiyeva rəhbəri olduğu təşkilatın adından Reza Deqatiyə xatirə hədiyyəsi və təşəkkür plaketi təqdim edib.
Sərgidə fotoqrafçının Şuşada işğaldan əvvəl və sonra çəkdiyi 60 foto nümayiş olunub.
Qeyd edək ki, 1952-ci ildə Təbrizdə azərbaycanlı ailəsində anadan olan Reza Deqatinin 14 yaşında çəkdiyi ilk foto təhsil aldığı məktəbin nəşr etdirdiyi “Parvaz” jurnalında yayımlanıb. Fəaliyyətinə İran İnqilabı ilə bağlı şəkillər çəkməklə başlayan sənətkarın bu fotoları tezliklə dünyanın bir çox yerlərində nümayiş etdirilib. Fotoqrafın əsərləri 2000-dən çox jurnalın üz qabığında yer alıb. Onun dünyanın 115 ölkəsində çəkdiyi fotoşəkillərin sayı iki milyonu ötüb.
Sənətkar 40 kitabın müəllifi, bir çox mükafatın sahibidir.
Reza Deqati Azərbaycan həqiqətlərinin dünya ictimaiyyətinə çatdırılmasında çoxillik səmərəli fəaliyyətinə görə Azərbaycan Respublikasının Prezidenti İlham Əliyev tərəfindən “Dostluq” ordeni ilə təltif edilib.
1987-ci ildən Azərbaycanla bağlı şəkillər çəkən fotoqraf 1992-ci ilin aprelində Şuşanın erməni qüvvələri tərəfindən işğal olunmasından bir neçə həftə əvvəl fotolarını çəkib. Reza Deqati 30 ildən sonra Şuşaya qayıdaraq şəhəri yenidən kamerasının yaddaşına köçürüb. Azərbaycanın füsunkar şəhərlərindən biri olan və erməni vandalizminə məruz qalan Şuşanın viran edilmiş vəziyyəti Reza Deqatinin müqayisəli fotoşəkilləri ilə beynəlxalq ictimaiyyətin diqqətinə çatdırılıb.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
