Rusiyanın Tula şəhərində keçirilən XI “Shorts” Beynəlxalq Kino festivalında Azərbaycanlı rejissorun “Yada sal məni” qısametrajlı filmi nümayiş olunacaq.

Kulis.az xəbər verir ki, filmdə Əməkdar artist Elşən Rüstəmov, Nuridə Musabəyli və Nigar Qasımova çəkilib.

Filmin rejissoru Masər Həsənov deyib: “Dekabr mənim üçün hərarətli olacaq. Rusiya ilə yanaşı İngiltərə, ABŞ və Azərbaycanda filmim nümayiş olunacaq”.

Film həyat yoldaşını itirəndən sonra özünə qapanmış tənha insanı diqqət mərkəzinə gətirir. Bir gün gecəyarısı onun qapısını balaca bir qız döyür. Filmin qəhrəmanı onun içəri daxil olmasına bir şərtlə icazə verir – yağış bitən kimi çıxıb getməlidir. Kişi xəbərsizdir ki, qapını döyən qonaq özü də kimsəsizdir və getməyə yeri yoxdur...

Azərbaycan Dövlət Mədəniyyət və İncəsənət Universitetini rejissorluq ixtisası üzrə bitirən Masər Həsənov magistr pilləsində Xalq artisti Eldar Quliyevin kursunda təhsil alıb. O, fiziki məhdudiyyəti olmasına baxmayaraq, müxtəlif layihələrdə fəallığı ilə seçilir, sənədli və bədii filmlərin, sosial çarxların müəllifidir. Gənc rejissorun “Dejavü” filmi Türkiyə, Rusiya və Rumıniyada festivallarda iştirak edib, “Sevgi naminə” qısametrajlı bədii filmi IX Beynəlxalq Müstəqil Müəllif Filmləri İnternet Festivalının mükafatını qazanıb.

O, həmçinin 2017-ci ildə Azərbaycan Respublikası Kinematoqrafçılar İttifaqının Rasim Ocaqov adına təqaüdünə layiq görülüb. 2019-cu ildə gənclər üçün Prezident mükafatçısı olub.

• Həsən bəy Zərdabinin Dumadakı fəaliyyəti - O, hansı işləri görmüşdü?
• Gecə - Varlam Şalamovun hekayəsi
• Necə oldu ki, biz kitab oxumağa başladıq? - Nübar Eldarqızı