Azərbaycan Kinematoqrafçılar İttifaqının əsas prioritet məsələlərindən biri də film nümayişlərini təşkil etməkdir. Bunda əsas məqsəd yerli kinorejissorların filmlərini nümayiş etdirməklə onlara dəstək olmaq, yeni xarici filmləri tamaşaçılar üçün əlçatan etmək və tamaşaçılarda film müzakirəsi ənənəsini formalaşdırmaqdır.

AKİ-dən Kulis.az-a verilən məlumata görə, bu il ərzində “Visla” Polşa film festivalı ilə əməkdaşlıq çərçivəsində 6 tammetrajlı bədii film, İsveç Krallığının Bakıdakı səfirliyi ilə əməkdaşlıq çərçivəsində isə 4 tammetrajlı bədii film nümayiş olunub.

2023-cü ilin ilk nümayişində “Səadət sorağında üç qəhrəman” başlığı adı altında üç qısametrajlı sənədli film – Elvin Aşirovun “Eviniz haradadır”, Pərviz Həsənovun “Uşaqlıq fotosu” və Aynur Kazımovun “Unudulmuş arzular” filmləri yer alıb.

Fevral ayında İlkin Yusifin “Mən qəhrəman axtarıram” tammetrajlı sənədli filmi, Arif Babayevin 95 illik yubileyi münasibətilə “Gün keçdi” bədii filmi, “Ən yeni tariximiz kinoda” başlığı altında Qulu Əsgərovun “Hasar”, Əli-səttar Quliyevin “Mən qardaşımı axtarıram” və Rüstəm Babazadənin “Son payız” qısametrajlı bədii filmləri və Nikita Mixalkovun “Şahidsiz” tammetrajlı bədii filmi Azərbaycan dilində dublyajla nümayiş olunub. Elmar İmanovun “Ayrı-ayrı” və “Tabutçunun yelləncəyi” bədii filmləri martda nümayiş olunub. Aprel ayında İlqar Nəcəfin “Suğra və oğulları” və İsmayıl Səfərəlinin “Balıqçının qızı” tammetrajlı bədii filmlərinə yer ayrılıb.

30 may tarixində rejissor Oktay Mir-Qasımın 80 illik yubileyi münasibətilə “Günaydın mələyim” tammetrajlı bədii filmi tamaşaçılara təqdim olunub.

Rejissor İlqar Safatın “Sahə”, Andrey Tarkovskinin “Güzgü” tammetrajlı bədii filmləri iyunda nümayiş olunub.

İlin yeni mövsümündə “Üç evin hekayəsi” başlığı altında Amil Amalın “Vulkan üzərində ev”, Kamal Müşfiqin “Motivator”, Leyla Qənbərlinin “Qırmızı ev” qısametrajlı sənədli filmləri (sentyabr), Şirin Əhmədovun “Qütb ulduzu”, Elnur Paşanın “Yalnız məzar” qısametrajlı bədii filmləri (oktyabr) nümayiş olunub. Oktyabrın 10-11-12-17-24-31 tarixlərində “Visla” Polşa Film Festivalı ilə əməkdaşlıq çərçivəsində 6 tammetrajlı Polşa bədii filmlərinin nümayişi baş tutub.

İsveç Krallığının Bakıdakı Səfirliyi ilə əməkdaşlıq çərçivəsində 4 İsveç tammetrajlı bədii filmlərinin nümayişi (7-14-21-28 noyabr) baş tutub. Nümayişin açılışnda səfirliyin əməkdaşları da iştirak edib/

Tofiq Tağızadənin “Yeddi oğul istərəm” tammetrajlı bədii filmi, “Sənədli film gecəsi” başlığı altında Elvin Aşirovun “Gülyetərin qayıdışı”, Pərviz Həsənovun “Fəsillər”, Orxan Adıgözəlovun “Nigaran” qısametrajlı sənədli filmləri, Rəşad Babayevin “Biletsizlər” tammetrajlı bədii filmi (dekabr) nümayiş olunub.

• Kralın toy tortu 15 il sonra hərraca çıxarıldı
• "Qaraçı qızı" mozaikasının daha bir itkin parçası aşkarlandı
• Milli Teatrda "Payız sonatası" hazırlanır