Kulis.az Pərviz Cəfərlinin poetik deyimlərini təqdim edir.
Mənim duam - xoşbəxtlik anlarında içdən boylanan minnətdarlıq sözləridir kainata
***
Gözəllik – həqiqətin xaricidir, əbədi olan iç gözəllikdir.
***
Dua o zaman yaranar ki, insanın bacarıqları bitər. Əsl dua gül buketi kimidir, ona görə də hər söz, hər cümlə içdən və səmimi olmalıdır.
***
Həqiqət heç vaxt hipnoz etməz, özünü təsadüfən və zorla buraxmaz bizlərə.
***
Bizlərin əbədi faktları yox, əbədi potensialları var.
***
Adi sudan ot bitmir.
***
Yağmurlu sakit gecə
Qaranlıq binalar
O , küçə lampalarına ulduzlar taxdı...
***
Yol itsə də, məqsəd uzaq olsa da, ağlımın gəmisi sularda batsa da, ayaqlarımın gözləri axtaracaq hər gün səni...
***
Sən mümkünsən !
***
Hər qəlb sönmüş közdür – sevgi atəşi lazımdır ancaq.
***
Güvən səbəbsizdir
Sevgi səbəbsizdir
O, səbəbsizdir
Ən gözəl təcrübələr səbəbsiz olur.
Harasa getmək, nəyəsə çatmaq – sevgidən uzaqlaşdırır.
Hər an sevgi olmaq, gözlərinlə hər şeyi sevgiylə doldurmaq !
***
Sevgi qüsursuz görməkdir.
Sevdiyiniz nədirsə, onda qüsur tapmırsız.
Qüsur sevgisizliyin olmasıdır.
Ona görə O qınamır,pisləmir, bizim iyrənc saydıqlarımızı belə təhqir etmir.
O sevgidir, sevməyə bilməz
Qanadlanıb səmalara qalxarkən bunları ürəyimdə tapıram
***
Necə sevməmək olar ?
Bu qəribədir
Bu ən dahiyanə aldanışdır.
***
Həqiqət düşünmək , hiss etmək , bilmək deyil – görmək və olmaqdır.
***
Xəyalımı bir toxum kimi təmizlədim, səmadan torpağa atdım
***
Bir yumurtada həyat
Bir insanda həyat
Bir damlada okean.
O əks olunub sadəcə, heç yaranmayıb, olmayıb da.
Olan-olmayan hər şey onun əksidir
***
Sən uşaq kimi havaya rəngli kainatlar üfürənsən
Hər an işdəsən, hər an yaradansan, bunu yazan da sənsən
***
Sevgi – tanrıdır, heç nəyi yaratmayan, mövcud olmayan.
Aldanmaqdan, içinizə yeridilən yalanlardan azad olmaqda, özünüzü kəşf
edib zəncirləri atmaqda, içinizdəki suya çatıb doymaqda sizə sevgi kömək
edəcək
Qısqanclıqdan, paxıllıqdan azad olmaq üçün ölümünə sevin, dərinlərə kimi
sevin.
Sevgi ətrafa göndərdiyimiz şəfqətdir.
Sevgi anlamağa imkan ,güc verən səadətdir.
Sevgi ali şuurdur.
Sevgi ancaq yaxşılığın olmasıdır.
Sevgi dünyanın bizim anamız olmasını hiss etdirəndir.
Sevgi illuziya , qorxulardan azadlıqdır.
Sevgi azadlığın sinonimidir.
Sevgi axan göz yaşlarını silib, əzabları qapadan , zülmətdən işığa yol
açandır.
Sevgi ürəklərin səmadan dinlədiyi surələrdir
İlk addım, ilk söz, ilk duyğu sevgidir.
Sevgi ruhu aşkarlayandır
Sevgi ürəklərin dərin siminə toxunan tanrı əlidir
Sevgi çiçəklərdən nektar yığan arı, gözəlliklərdə tənbəl-tənbəl xoşbəxtləşən
kəpənəkdir
Sevginin ölçüsü yoxdur, o həyatı bayrama çevirəndir
Tanrı sevgidir
Sevgi şəfqətdir
Sevgi bizdən gəlməyən, bizə tabe olmayan , ürəyimizin sonsuzluğudur
***
Müqəddəs haçalanmayıq biz
***
Sənə hər şeydə ürəyim “hə” deyir, bağışlayır və rəqsə dəvət edir.
