Bu gün “Kulis”in 14 yaşı tamam olur.
Bu münasibətlə yazıçılar öz fikirlərini, arzularını bizimlə bölüşüb.
"Kulis.az mənim üçün doğma, mənəvi məkandır. Oxuduğum, razılaşıb-razılaşmadığım hər bir yazısı ilə maraqlı və faydalıdır.
Bu günə qədər neçə-neçə layiqli imzalara sinəsini açıb. 14 il ərzində bu sayt ədəbiyyatımızı, mədəniyyətimizi səviyyəli şəkildə təqdim etməkdədir.
"Kulis"ə gördüyü bu şərəfli işində uğurlar, yeni yaradıcılıq sevincləri arzu edirəm".
"Kulis.az mədəniyyət portalının adını kim fikirləşib tapıbsa, ona bir əhsən! Nədən ki, sözün semantik çəmbərində fırlanan mənalar müxtəlif fikir oynatmalarına əla yollar açır. Bir tərəfdən bu ad teatr dünyası, pərdəarxası həyatla baxışır və elə bil ki portalın “biz mədəniyyətin həm üzünü, həm astarını göstərməyə fokuslanmışıq” mesajını ötürür. Digər tərəfdən isə fransızcadan tərcümədə bu söz “ədviyyat” anlamında aktuallaşır və sanki “biz şərhlər, kommentlər mozaikasını mədəniyyət olaylarının üstünə ədviyyat kimi səpələməyi düşünürük” konseptini portalın məqsədlərindən biri statusunda gündəmə gətirir.
"Kulis"çilərdən yaş etibarı ilə çox-çox böyük olsam da, onları özümə dost bilmişəm, doğma bilmişəm və hey bu mədəniyyət portalına öz məqalələrimi, hekayələrimi, esselərimi göndərmişəm. "Kulis" çətirinin altında hamıya yer var!
Əziz teatrşünas həmkarım Aliyə xanım Dadaşova hər zaman bir əlaqələndirici missiyasını yerinə yetirib mənimlə sayt arasında: daha sonra yazılarını çirkab içrə pak səmimiyyətə bürümək istəyən Vüqar Van (Babazadə); indi də orijinal və ekstravaqant Ömər Xəyyam. "Kuliz.az" Mədəniyyət portalı Şərif Ağayardan, Qan Turalıdan üzü bu yana həmişə mənə tanımadığım gənc yazarların ruh dünyası ilə tanış olmaq, kimlərisə kəşf etmək, kimlərisə öyrənmək imkanı verib.
Bu 14 ildə kimlər gəldi, kimlər getdi, kimlər keçdi bu "Kulis.az"dan... Sayı yox, hesabı yox... Hərçənd bu Mədəniyyət portalından bütün Azərbaycan ədəbiyyatı, sənəti öz keçmişini, müasirliyini içinə alaraq bir gümüşü şar formatında görünür.
Yaşa, yaşa dol, əvvəl mənim, sonra Anarın yaşına çat, Azərbaycan mədəniyyətini yaşat!!!"
"Kulis"in 14 yaşı mübarək olsun. "Kulis" ölkədə ən populyar ədəbiyyat saytıdır, ədəbi prosesi işıqlandırmağa çalışır. Bu yolda sayta bundan sonrakı fəaliyyətində də uğurlar diləyirəm. Arzum budur, saytda peşəkar ədəbi materiallara daha çox yer verilsin, diletantizmdən mümkün qədər uzaq durulsun. Reytinq dalınca qaçılmasın, materialların redaktə olunmasına daha diqqətli yanaşılsın. Mən qəti əminəm ki, ədəbi qəzetdə, ədəbi saytda "ədəbsiz", yəni redaktəsiz, qüsurlu cümlə getməməlidir. Başa düşürəm ki, saytın kollektivi gəncdir, işləyə-işləyə püxtələşir. Ümidvaram, gələn ad gününə qədər nöqsanlar da aradan qaldırılacaq. Hamınıza uğurlar diləyirəm!"
"Kulis.az saytının fəaliyyəti, var olması çağdaş ədəbiyyatımızın mənzərəsini yaratması baxımından çox əhəmiyyətlidir. Daha da müstəqil olmasını, ədəbiyyat generallarının təsirinə düşməməsini arzulayıram".
""Kulis" yarandığı gündən doğma olub. Dostlarım yazıblar orada, işləyiblər, evlərinə çörək aparıblar. Mənim də azdan-çoxdan qonorar aldığım vaxtlar olub. Bu da çox vacibdir. Həm də mənəvi bağlıyıq "Kulis"ə, sözümüz olanda, gileyimiz-güzarımız olanda onun tribunasından istifadə eləmişik. Daha nə olsun? Çox yaşasın! Böyüsün, daha da inkişaf etsin arzu edirəm!"
"Kulis.az gözümüzün qabağında 14 yaşa gəlib çatdı. Bu illər ərzində "Kulis" həm yeniyetmə çılğınlığını özündə yaşadıb, həm də ədəbiyyatımızın təbliğində mühüm rol oynayıb. Mən saytın fəaliyyətini yüksək qiymətləndirirəm. Bəzən də çaşdırıcı başlıqlarla oxucuları ədəbiyyata yönəltmək istəyib. "Kulis"in ətrafında istedadlı insanlar toplaşıb. İstedadlı gəncləri mən yüksək qiymətləndirirəm Arzulayıram ki, yaş artıqca daha təmkinlə ədəbiyyatın təbliği ilə məşğul olsunlar. Gələcək yaşları daha təntənəli qeyd etmək arzusu ilə".
"Kulis.az mənə ən doğma ünvanlardan biridir. Ədəbi taleyimin bu layihə ilə bağlılığından çox məmnunam. Ən çətin günlərimdə – yaşlı totalitarların üstümə hücuma keçdiyi bir vaxtda birmənalı mənim yanımda, yəni mütərəqqiliyin, yeniliyin, boyunduruğa yox deyən sözün yanında olub. Məni bir əməkdaş kimi ayağa verməyib. Bütün zərbə altına düşən digər əməkdaşlar kimi. Elə bu səbəbdən yolum hərlənib-fırlanıb "Kulis"dən düşüb. Əvvəl müəllifi olmuşam, sonra redaktoru, ən sonda baş redaktoru. Bu məsuliyyətli işləri görməklə yanaşı sürücülükdən tutmuş müxbirliyəcən xidmətində dayanmışam və bundan qürur duymuşam. Çünki "Kulis" hər bir qələm adamına həmişə hörmətlə yanaşıb, ona maaş verib deyə şəxsi fikir və düşüncələrinə qarışmayıb, layklarını güdməyib.
Əvvəldən "Kulis"də elə bir mühit yaradılmışdı ki, özünü bir sənət, ədəbiyyat akademiyasında hiss edirdin. Şübhəsiz, bu işdə baş redaktor Qan Turalının, redaktorlar Fərid Mirzəyevin, Ağa Cəfərlinin, Elmin Həsənlinin, Mirmehdi Ağaoğlunun və digərlər əməkdaşların böyük zəhməti vardı. Sonrakı dövrdə biz də bu ənənəni mümkün qədər, gücümüz çatan qədər qorumağa çalışdıq. Çünki bu iş zaman keçdikcə çətinləşirdi və çətinləşməkdə davam edir. Bu da "Kulis"lə bağlı deyil, ölkənin ümumi vəziyyəti, ümumi gedişatla bağlıdır.
"Kulis" mənə çox şey verdi. Çox şey öyrəndim burada. Sağlam mühit gördüm. Ədəbiyyatın nüvəsində dayanmağın məsuliyyətini və zövqünü yaşadım. Ən uğurlu yazılarımı yazdım. Əlbəttə, problemlər də, gərginliklər də, narazılıqlar da oldu. Bu da təbiidir. Lakin bir məsələyə həmişə yazıçı vicdanı ilə diqqət yetirdim: ədalət tərəzisinə! Yaxşı-yamanı əks tərəflərə yığanda "Kulis"in necə böyük, sanballı bir iş olduğunu gördüm və görürəm. "Kulis"ə uzun ömür, "can sağlığı" arzu edirəm. Bunun ikisi də vacibdir. Yaşamasa, ruhi sağlamlığının, ruhi sağlamlığını itirsə, yaşanmasının əhəmiyyəti qalmaz. Hər ikisi ilə yaşasın, hər ikisini yaşatsın və həmişə üzümüzə oksigen nəfəsliyi kimi açılsın".
"Ulucay Akif sağ olsun, xatırlatdı ki, "Kulis"in 14 yaşı tamam olur, yoxsa hərdən adamın öz adı da yadından çıxır. Həm bədii mətnlərin və həm də ədəbi informasiyaların çağımızdakı ən mütəhərrik, çevik, populyar saytı, elektron dərgisi həddi-büluğ yaşına çatır demək, yetkinləşir.
Hadisə tələb edir janrın tələbləri daxilində xoş sözlər yazasan, bu asan məsələdir. Amma "Kulis" yenə, növbəti dəfə fürsət verir ki, əvvəl başqa mətləblərdən danışaq.
Bir müdrik dostum var, nə vaxtsa mənə: - Kaş özümüzə arzu etdiyimizin bizim üçün, həqiqətən, xeyirli olduğunu biləydik, çox vaxt belə olmur, - dedi. İndi bunu niyə xatırladım, hələ bilmirəm...
Ədəbiyyatçı – adamdır, diridir, dəyişkəndir, təkamül edir, mərhələlərlə; çox ola bilsin, bir mərhələdə düşündüyünü növbəti mərhələdə bəyənməsin, hətta dolayı yolla təkzib eləsin. Klassikanı və klassikləri cari ədəbi simalardan fərqləndirən bir vacib məqam var: klassiklər bu mərhələlərdə üslublarını dəyişiblərsə də, prinsiplərini dəyişməyiblər və bu mənada it hürəndən işıq gələnə üz tutmayıblar: nə bədii yazılarında, nə məqalələrində, nə da gündəlik ədəbi mətləblərə reaksiyalarında.
"Kulis" cari ədəbi prosesə, xüsusən, informasiya qatında geniş meydan verib, bəli, bu şəxsən mənim getdikcə daha çox skeptik yanaşdığım demokratik dəyərlər baxımından doğru olubsa da, əbədi ədəbi meyarlar baxımından o qədər də səxavətli görünməyib; soruşula bilər ki, əbədi ədəbi meyarların “xətkeşi” hardadır? Elə “klassisizm”in özündə ki, təmsil, komediya, satira “alçaq” janrlar sayılır, lap aşağı mərtəbədə yer alıblar. O qədər olub "Kulis"dəki "tənqidi" məqalə, informasiya və yazıları oxuyub Labrüyer kimi düşünmüşəm: "Biz tənqid eləməyi o qədər sevirik ki, həqiqətən, gözəl yaradılmış şeyləri dərindən hiss eləmək qabiliyyətimizi itiririk...". Halbuki həqiqi, məqbul tənqid haradasa ilkin yaradılışla törəmə yaradılışın fərqinin yaratdığı sahədədi. Bu sahəni ölçmək, müəyyən etmək, ondan danışmaq hər nə qədər müşkül olsa da, mümkünlük və obyektivlik imkanını heç vaxt itirməyib. Obyektivlik isə qərəzsiz subyektivlikdi, bunu da bir başqa klassik deyib.
Əlqərəz, "mənə çox şeyləri ahəstəcə qandır"ıb "Kulis" bu illər ərzində, çox göstərib təkcə üslublarından deyil, prinsiplərindən də ilan dərisi kimi vaz keçən, tənqid, lağlağı edən edən cari ədəbi simaları.
Əvvəldə söylədiyim şəxsi dəyişkənlik mərhələlərini sancıyla adlayan, hər bir mərhələdəki qənaətlərini sonuncu instansiyaya aid həqiqət kimi qələmə verən unutqan və cürətkar həmkarlarımızı. Anlasaydılar ki, hər dəfə söylədikləri və asan vaz keçdikləri gələcək üçün nə qədər ağır miras, onlara, az qala, büt kimi yanaşan cavanlar üçün nə pis "tələdir".
Adətən, ad günümdə şənimə deyilən bol tərif və arzuları minnətdarlıqla dinləyib öz-özümə düşünürdüm ki, bəs, mən nə istəyirəm? Ya da özümə nə arzulayım?
Bütün məziyyətləri ilə bizim özümüzə, ədəbi mühitimizə oxşayan, bizim özümüz olan "Kulis"in 14 yaşı tamam olur. Və "Kulis"ə, onun işgüzar, istedadlı kollektivinə arzuları yazmaq məqamı gəldi. Yaxşı ki, varsız, yaxşı ki, varıq. Adam ad özünə nə arzulayar ki!?
Ancaq yaxşı şeylər. Ümid edirəm, bu yaxşı şeylər həm də, həqiqətən, xeyirli şeylər olacaq".
Mübariz Örən:
""Kulis" Azərbaycanda gedən ədəbi proseslərin episentrində olub. Avanqard olub. Ən azı, son 14 ildə belədi. Təməli möhkəm, relsi polad, gücü çox. Təkcə avanqard yox, bu yolun dayanmaz lokomotivinə çevrilib. Heç vaxt rəngini, səsini, dinamikliyini itirməyib. Gənc istedadlara həmişə yol verib, eyni zamanda, çox mifləri də dağıdıb, yaxşı mənada. Çox "hökmdarları" taxtından salıb. Bu cəsarətdə ona tay yoxdu. Bəlkə də, "Kulis"in yadında qalmaz, ilk hekayəm "Kulis"də çıxıb. Qapısı həmişə üzümə açıq olub. Bu mənada "Kulis" həm də doğma saytdı. Həmişə belə qalsın: yorulmaz, cəsarətli, təravətli, doğma!.."
""Kulis.az" saytı mənim üçün çox böyük əhəmiyyətə malik olan internet portalıdır. “Kulis”in ilk yarandığı günlərdən orada çıxış edən müəlliflərdən biri olmuşam. Mənim yadıma gəlir ki, "Kulis" yarananda Qan Turalı gənc müəlliflərə yazılarınızı göndərin deyə, müraciətlər edirdi. İlk yazılarım da həmin ərəfədə yayımlanmağa başladı. Sonralar tale elə gətirdi ki, “Kulis”də üç ildən çox müddətdə işləməli oldum və çox gözəl təcrübələr, dostlar, yoldaşlıqlar qazandım. Kulis, oradakı mühit bizi zəhmətə, məsuliyyətə, qaynar iş həyatına alışdırdı. Təbii ki, bir müəllif olaraq, mütaliə bazamı da “Kulis” ilə çox zənginləşdirmişəm. Ona görə də “Kulis”in hər ad günü mənə elə gəlir ki, ədəbi mühit üçün, mədəniyyət yazarları üçün, əli qələm tutan hər kəs üçün bayram olmalıdır. Ədəbiyyat saytının bu qədər uzun müddət işləməsi, fəaliyyət göstərməsi çox müsbət göstəricidir. Zaman-zaman, əlbəttə, belə fikirlər olub ki, “Kulis” getdi, “Kulis” batdı, “Kulis” çökdü, amma gördüyünüz kimi “Kulis” yaşayır. Mən ilk gündən, bu günə qədər “Kulis”in fəaliyyətində, inkişafında, ayaqda qalmasında əməyi keçən bütün dostlarımı, bütün insanları, saytın baş redaktoru dostumuz Ulucay Akifi təbrik edirəm. “Kulis”dən gəlib keçən bütün dostlarımızın hamısını, bu gün də orada çalışan həmkarlarımı, dostlarımı təbrik edirəm. APA Holdingin rəhbəri Vüsalə xanıma təşəkkür edirəm ki, “Kulis”i bu gün də ayaqda saxlamağa çalışır, cəhd edir, səy göstərir".
"Ərəbcə hesab edilən qida sözü bizim qut (qud) sözümüzdən yaranmışdır. "Kulis" – böyük bir mənəvi qida süfrəsinə bənzəyir; bu süfrə ətrafında əyləşənlər öz gətirdikləri nemətləri süfrəyə düzürlər. Bir tərəfdən fəxr edirsən ki, sən də bir aşçı kimi bu süfrəyə öz məhsulunu qoya bilmisən, bir tərəfdən də sevinirsən ki, sən də bu süfrə ətrafında əyləşmisən, ta ac qalmazsan.
Biri bu süfrəyə çox gətirir, az yeyir, o biri az gətirir, çox yeyir. Biri usta aşçıdır, o biri hələ aşçı şəyirdidir. Bu süfrə ətrafında əyləşib, bəzən günlərlə yeyib-içməyə heç nə tapmayaraq ac-susuz qalmaq da olar, bəzən isə bir gündə bu süfrəyə o qədər dadlı, o qədər ləzzətli və faydalı xalis məhsullar düzülür ki, onları günlərlə dadıb qurtarmaq istəmirsən.
"Kulis" – nəhəng ədəbi mətnə də bənzəyir. Qəhrəmanları dəyişir, inkişaf edir, yox olur, süjet isə eyni qalır. Bu mətnin oxucuları mətnin içindədirlər. Oxuyanlar yazır da, yazmayanlar oxumur da. Bu nəhəng mətnin müəllifi isə Azərbaycan kulturasıdır.
Kulturamızda təkrarçılığa, əzbərçiliyə və ütülülüyə soyuq münasibət var. "Kulis"i yaşadan onun həyəcanıdır; "Kulis"də canlı ürək döyüntüsü var. "Kulis" özü-özünü yazan diri kitaba da oxşayır. Bu kitab akademizm ilə kütləvilik, mücərrəd nəzəriyyəçilik ilə sadə konkretçilik arasında yerləşir.
Sovet dövrünün ədəbi normalarının senzurasını indi "hər şey gedər" (“anything goes”, P. Feyerabend) ədəbi liberalizmi əvəz etmişdir və "Kulis" bu azadlığın "paytaxt"ıdır. Burada, Dostoyevski romanlarındakı kimi, hamı danışır, sələmçi qadını öldürən də, bədənini satan qadın da. Burada hamıya yer var. "Kulis" bu "mərkəzsizliyin" və yaxud "çoxsəsliliyin" (polifoniya, M. Baxtin) gözəl nümunəsidir.
"Kulis" indi sanki tək, rəqibsiz və alternativsiz görünür. Bu, əlbəttə, sevinc və qürur mənbəyidir. Lakin həm də gələcəkdə ədəbi monopoliya təhlükəsidir. "Kulis" günlərin bir günü hansısa müəllif və yaxud müəllifləri qeyri-ədəbi səbəblərdən çap etməkdən imtina edərək ədəbi qətllər həyata keçirə bilər. Heç kimin bundan xəbəri də olmaz. Bu, bütün tək, rəqibsiz və alternativsizlərin başına gələ bilən və onların törədə biləcəkləri fəlakətdir. Hərdən adama elə gəlir ki, "Kulis" müəllifləri başqa ehtiyat platformaları da gücləndirməlidirlər.
"Kulis"i ad günü münasibətilə ürəkdən təbrik edirəm. Onu alqışlayıram. Ona xüsusilə folklor tədqiqatları və dilçilik istiqamətlərində böyüməyi arzu edirəm. "Kulis"ə ümidlərimiz böyükdür".
Etimad Başkeçid:
"Kulis.az müxtəlif zövqlü insanların maraqlarınını kəsişdiyi, bilik mübadiləsinin aparıldığı platforma kimi postsovet dövrünün ən uğurlu proyektlərindən biridir. Öz informativliyi, əlçatanlığı, ən müxtəlif mədəni istiqamətləri və ənənələri əks etdirməsi, inklüzivliyi ilə, uzun illərdir ki, aparıcı mövqeyini qoruyub saxlamağı bacarıb.
"Kulis" – yaradıcılıq, müzakirə, mədəniyyət haqqında refleksiya məkanıdır.
Saytın, yaradıcı heyətini, bütün əməkdaşlarını, dostlarını, ümumiyyətlə, ədəbi cameəni bu əlamətdar tarix münasibətilə təbrik edirəm. "Kulis"ə mənalı, uzun ömürlər arzulayıram!"
Mirmehdi Ağaoğlu:
"Kulis.az mənim "alma-mater"im, bir jurnalist kimi ilk dəfə işlədiyim redaksiya, ən doğma mətbuat evi, ocaqdır. Buna görə də həmişə "Kulis"lə bağlı yaxşı şeylərə sevinmiş, pis şeylərə üzülmüşəm. Harada bir yaxşı material görsəm, istəmişəm, "Kulis"də də getsin, orada da görünsün. "Kulis"də də yaxşı bir material görəndə istəmişəm hamı oxusun. Sevinirəm ki, "Kulis"in böyüyüb həddi-buluğ yaşına çatmağında mənim də əməyim olub. Artıq "Kulis" ayaqlarını yerə daha möhkəm basır... "Kulis" ədəbiyyat sahəsində bayraqdara çevrilib. Arzum budur ki, "Kulis" hələ çox illər bu bayrağı başının üzərində dalğalandırsın. Bir az müasir incəsənət və mədəniyyəti əhatə etmək, türklər demiş, qapsamaq baxımından boşluqlar görürəm, zənnimcə, bu boşluğu da 15 yaşa kimi düzəldərlər".
Şəhriyar del Gerani:
"Mədəniyyət üçün ən vacib şərtlərdən biri mütəmadilik, davamlılıqdır. Ölkədə uzunömürlü mədəniyyət layihələri deyəndə ağlıma ilk gələn Fehruz Şamıyevin "Bakı Beynəlxalq Film Festivalı", Könül Arifqızının "Bir mahnının tarixçəsi", Səyyarə Səyyafın "Ovqat" proqramı və bir də bizim müqəddəs "Kulis"dir. Heç kəsin xətrinə dəyməsin, bu mənada "Kulis"artıq ədəbiyyat tarixinə düşüb deyə bilərik qəti tərəddüd etmədən. "Kulis"ə sadiq qaldığı üçün əzizim dost Vüsalə Mahirqızına dünən və əbədi olduğu kimi dəruni təşəkkürlərimi bildirirəm. "Kulis" mənim, az qala, hər gün baxdığım pəncərədir. Bu fərəhsiz və stimulsuz ədəbi mühiti bu pəncərədən izləmək, deyəsən, ümid yeridir həm də. "Kulis"siz çətin olardı. Yəni, pəncərəsiz otaq kimi bir yer düşünək. Mübarək olsun 14 yaşı. Bu gün orda çalışan qələm dostlarımı və bütün qələm dostlarımı təbrik edirəm. Eşqlər!"
İlham Əziz:
"Doğma "Kulis"in 14 yaşı tamam olur. 14 yaş gəncliyə qədəm qoymaqdır. Qarşıda onu daha gözəl illər, daha gözəl işlər gözləyir. "Kulis" mənim yazıçı kimi formalaşmağımda və tanınmağımda müstəsna rol oynayıb. Elə bilirəm, dünyada mənə yer olmasa, "Kulis"də tapılar. "Kulis" mənim ədəbiyyat yurdumdur. Onu bu günə kimi qoruyub saxlayan, orda vicdanla çalışan və oxuyan hər kəsə sevgilər, sayğılar. Ora bizim mətnlərimizin cücərdiyi, boya-başa çatdığı yerdir. Ömrü uzun olsun, illər, qərinələr yaşasın!"
Fərid Hüseyn:
"Əvvəla, "Kulis"in yeni yaşını təbrik edir, kollektivə uğurlar arzulayıram. 14 ildir ki, ədəbiyyatının nəbzinin döyündüyü bir ədəbi ünvanı ayaq üstə saxlayaraq, yaradıcılıq nöqteyi-nəzərindən simasını, ədəbi çöhrəsini formalaşdıraraq öz varlığını sürdürür. Bəzən deyirlər ki, "Kulis" əvvəlki "Kulis" deyil, ona qalanda, heç ədəbiyyata münasibət, insanlardakı şövq də əvvəlkisayaq deyil. Suların durulmasında, ədəbi aldanışların tirajlanıb sonra hamılıqla hər kəsin gözünün açılmasında bu saytın da əhəmiyyətli rolu oldu. Ədəbi mətbuat ədəbi mühitin güzgüsüdür. Əslində, XXI əsrin ilk onilliklərinin ədəbiyyat mənzərəsi çox rəngarəng və mürəkkəb oldu. Bu illərdə "Kulis" də - ədəbiyyatın yaxşı-yamanını həm özü daddı, həm də oxucuların zövqünə daddırdı. Saytın "axtarış boşluğunda" hər kəs istədiyi müasirinin adını yazıb onların illərlə hansı ədəbi işləri gördüyünü, nələr qələmə aldığını görə bilər. Bu bir. İkinci məsələ isə, ötən illərdə bu sayta nə qədər gözəl əsərlər çap olundu və onlar insanlarda zövq aşıladılar. Bütün bunları yada salmaq lazımdır.
Bir daha "Kulis"də çalışan yaradıcı dostlara həqiqi uğurlar arzulayıram. Arzu edirəm ki, ədəbiyyatda "Kulis" var deyə var olmasınlar, "Kulis"lə birgə var olsunlar".
