Bu gün İtaliyanın Monfalkone şəhərində ARB Aran Media Şirkətinin "Aran Film" Yaradıcılıq Mərkəzinin və "Nova Gorica" Kino Mərkəzinin təşkilatçılığı ilə Azərbaycan kinosunun yaranmasının 120 illiyi münasibətilə kino baxışı keçirilib.

Kulis.azın məlumatına görə "Aran Film" Yaradıcılıq Mərkəzinin istehsalı olan “Unudulmuş partizan” və “Salnamə” kinostudiyasının istehsalı olan “Qafqazdan Apenninə” filmləri nümayiş olunub.

Tədbirin reallaşmasında "Euroclima", "Immergas " şirkətləri və Sloveniya-Azərbaycan dostluq cəmiyyətinin xüsusi rolu olub. Tədbirin məhz Monfalkone şəhərində keçirilməsinin səbəbini bu şəhərin II Dünya Müharibəsi illərində İtaliya və Sloveniya torpaqlarının azadlığı uğrunda döyüşlərdə iştirak etmiş azərbaycanlılara doğma olması ilə izah etmək olar. Triyest, Monfalkone, Qoriça şəhərləri Azərbaycan partizanlarının ən çox mübarizə apardığı ərazilər olub.

İtalyan və sloven partizanlarının iştirakı ilə keçirilən tədbirdə professor Marina Rossinin Sovet partizanları, xüsusilə də Azərbaycan partizanları haqqında kitabının da təqdimatı keçirilib.

Triyest, Monfalkone, Qorisa şəhərlərinin ictimaiyyət nümayəndələri bu tədbirdə fəal iştirak ediblər.

Bu cür tədbirlərin avqustun 2-dək 4-5 ölkədə keçirilməsi nəzərdə tutulub.

• Heydər Əliyev Mərkəzinə nadir incəsənət kompozisiyası gətirilir
• Milli Dram Teatrı: "Onlar tamaşanın afişası ilə bağlı mübahisə ediblər"
• 3500 illik firon məzarı aşkarlandı