Azərbaycanlı rejissor Elçin Musaoğlunun ekranlaşdırdığı “Türkiyə mənim də Vətənimdir” adlı sənədli filmin Malatya şəhərində təqdimatı olub.

Türkiyədə 15 iyul dövlət çevrilişi cəhdindən bəhs edən filmin istehsalı 7-ci Malatya Beynəlxalq Film Festivalı çərçivəsində reallaşıb.

Təqdimat mərasimində çıxış edən Malatya Beynəlxalq Film Festivalının direktoru Suat Köçer 15 iyul hadisələri ilə bağlı qısametrajlı, sənədli və tammetrajlı filmlərin çəkildiyini vurğulayaraq, dövlət çevrilişi cəhdini bir az daha fərqli aspektdən şərh etmək istədiklərini söyləyib.

Sənədli filmin rejissoru Elçin Musaoğlu 15 iyula bənzər bir hadisənin azərbaycanlıların 1990-ci ilin 20 yanvarında yaşadığını söyləyərək həmin vaxt sovet ordusunun, tanklarının Bakıya daxil olduğunu bildirib: “O gecə biz 140-dan çox şəhid verdik. 15 iyulda da mən həmin gecəni xatırladım, eyni hissləri yaşadım. Türkiyə bizim də vətənimizdir”.

E.Musaoğlu sənədli filmin üzərində 9 ay işlədiklərini söyləyib.

Malatya Beynəlxalq Film Festivalının rəhbəri və Malatya Böyükşəhər Bələdiyyəsinin sədri Əhməd Çakır Türkiyə və Azərbaycanın çox dərin tellərlə bir-birinə bağlı iki ölkə olduğunu bildirərək 15 iyul dövlət çevrilişi cəhdini əks etdirən “Türkiyə mənim də Vətənimdir” sənədli filmini istehsal etdiklərinə görə qürur duyduqlarını deyib.

Qeyd edək ki, 15 iyul gecəsi baş verən dövlət çevrilişi cəhdi zamanı Türkiyədə yaşanan hadisələrin azərbaycanlıların gözü ilə lentə köçürüldüyü sənədli filmin çəkilişləri Bakı, İstanbul, Ankara, Sakarya və Malatyada aparılıb. /azertag.az/

• Van Qoqun tablosuna görə məhkəmə iddiası qaldırılıb
• Ermənistanda kilsənin televiziya kanalı bağlana bilər
• Lənkəranda kino günləri keçiriləcək